काठमाडौ,१० साउन – फ्रान्स र स्पेनमा पछिल्ला केही दिनयता फैलिएको भीषण डढेलोका कारण तीन लाखभन्दा बढी मानिस आफ्नो घर छाड्न बाध्य भएका छन्।
उच्च तापक्रम र तीव्र गतिमा बहिरहेको हावाले आगो नियन्त्रणमा लिन चुनौती थपिएको सम्बन्धित अधिकारीहरूले बताएका छन्।
फ्रान्सको दक्षिणपश्चिम क्षेत्रमा फैलिएको डढेलो अहिले बोर्डो शहरतर्फ बढिरहेको छ। आगोको जोखिम बढेपछि बोर्डोको पश्चिममा रहेका सात नगरका बासिन्दालाई सुरक्षित स्थानमा स्थानान्तरण गरिएको छ। बीबीसीका अनुसार तीव्र हावाका कारण आगो अझ तीव्र रूपमा फैलिँदै गएको हो।
शनिबार साँझ मात्रै फ्रान्स सरकारले थप ५५ हजार मानिसलाई सुरक्षित स्थानमा जान निर्देशन दिएको थियो। अधिकारीहरूका अनुसार डढेलो अझै नियन्त्रणमा आउन सकेको छैन र बोर्डोबाट करिब ४०–५० किलोमिटरसम्मको क्षेत्रमा आगो फैलिएको छ। धुवाँ शहरसम्म पुगेपछि स्थानीय बासिन्दाले हावामा बाक्लो धुवाँको गन्ध महसुस गरेका छन्।
आगो नियन्त्रणका लागि फ्रान्सले सेना परिचालन गर्नुका साथै झाडी सफा गर्ने र आगोको फैलावट रोक्न अवरोध निर्माण गर्ने कामलाई तीव्रता दिएको छ। सन् २०२६ को सुरुदेखि हालसम्म फ्रान्समा ९८ हजार हेक्टरभन्दा बढी वन क्षेत्र डढेलोबाट प्रभावित भएको जनाइएको छ।
यता स्पेनमा पनि डढेलोको अवस्था गम्भीर बनेपछि संकटकाल घोषणा गरिएको छ। म्याड्रिड र अभिला क्षेत्रमा मात्र करिब ६० हजार मानिसलाई सुरक्षित स्थानमा सारिएको छ भने २८ हजारभन्दा बढी नागरिक अझै घरभित्रै बस्न बाध्य छन्।
स्पेनका प्रधानमन्त्री पेड्रो साञ्चेजले अवस्था चुनौतीपूर्ण रहेको स्वीकार गर्दै यस वर्ष हालसम्म एक लाख ३० हजार हेक्टरभन्दा बढी वन क्षेत्र डढेलोले नष्ट गरेको जानकारी दिएका छन्। यो पछिल्लो दशकको वार्षिक औसत एक लाख हेक्टरभन्दा धेरै हो।
यसैबीच, भ्यालेन्सिया क्षेत्रमा डढेलोका कारण एक जनाको ज्यान गएको पुष्टि भएको छ। स्थानीय सञ्चारमाध्यमका अनुसार करिब ७० वर्षीय एक पुरुष मानिसेसको साल्ट दे लुआइगुआ खोंचमा आगो निभाउने क्रममा आफ्नै कारभित्र मृत अवस्थामा फेला परेका थिए।
