बीरगन्ज,१३ साउन । पर्साको वीरगन्जमा फेरि एकपटक मनोज ग्यासको अभाव देखिएको छ। ग्यासको आपूर्ति नियमित हुन नसकेपछि उपभोक्ताहरू बिहानैदेखि विभिन्न डिपोमा पुगेर लामो समय लाइनमा बस्न बाध्य भएका छन्। घरायसी प्रयोजनका लागि अत्यावश्यक एलपी ग्यास समयमै नपाउँदा सर्वसाधारणले सास्ती खेप्नुपरेको छ।
बिहानदेखि नै डिपोमा ग्यास लिन पुगेका उपभोक्ताहरूले घण्टौँ पालो कुर्दासमेत सिलिन्डर प्राप्त गर्न नसकेको गुनासो गरेका छन्। कतिपय उपभोक्ताले सीमित मात्रामा ग्यास वितरण हुँदा सबैले ग्यास नपाएको बताएका छन्। नियमित आपूर्ति नहुँदा दैनिक खाना पकाउनेदेखि अन्य घरायसी कामसमेत प्रभावित भएको उनीहरूको भनाइ छ।
स्थानीयवासीले पटक–पटक ग्यास अभाव दोहोरिनु चिन्ताको विषय भएको उल्लेख गर्दै सम्बन्धित ग्यास कम्पनी, डिलर तथा सरोकारवाला निकायले आपूर्ति प्रणालीलाई व्यवस्थित बनाउनुपर्ने माग गरेका छन्। बजारमा कृत्रिम अभाव सिर्जना हुन नदिन प्रभावकारी अनुगमन गर्न र उपभोक्ताले सहज रूपमा ग्यास पाउने वातावरण सुनिश्चित गर्न उनीहरूले आग्रह गरेका छन्।
यता, ग्यासको अभावको वास्तविक कारणबारे सम्बन्धित पक्षबाट औपचारिक धारणा सार्वजनिक भएको छैन। उपभोक्ताहरूले भने नियमित र पर्याप्त आपूर्ति सुनिश्चित गरी यस्ता समस्या दोहोरिन नदिन तत्काल आवश्यक पहल गर्न सम्बन्धित निकायसँग माग गरेका छन्।
