बारा, २० भदौ । पूर्वपश्चिम राजमार्गअन्तर्गत बाराको दुधौरा–पिलुवा सडकखण्डमा टिपरको ठक्करबाट एक शिक्षकको मृत्यु भएको छ ।
शनिबार दिउँसो भएको दुर्घटनामा जीतपुरसिमरा उपमहानगरपालिका–१६ पिलुवाका ५२ वर्षीय देवबहादुर चौरेलको मृत्यु भएको हो ।
चौरेल कलैया उपमहानगरपालिका–२४ मनहर्वास्थित नेपाल राष्ट्रिय माध्यमिक विद्यालयमा शिक्षकका रूपमा कार्यरत थिए ।
प्रहरीका अनुसार पिलुवाबाट प्र.२–०३–०२२प ९६४५ नम्बरको मोटरसाइकलमा पथलैयातर्फ आउँदै गरेका चौरेललाई बैजुरा पुलमा निजगढतर्फ जाँदै गरेको ना.१अ यु १३४ नम्बरको टिपरले ठक्कर दिएको थियो ।
दुर्घटनामा गम्भीर घाइते चौरेललाई तत्काल उद्धार गरी वीरगन्जस्थित बयोधा मेडिसिटी अस्पताल पुर्याइएको थियो । तर, अस्पतालका चिकित्सकले उनलाई मृत घोषणा गरेका थिए ।
घटनापछि प्रहरीले टिपर र चालकलाई नियन्त्रणमा लिएर दुर्घटनाबारे थप अनुसन्धान अघि बढाएको जनाएको छ ।
