वीरगंज,२४ असाेज । नेकपा एमालेका नेता जालिम मियाँका दुई छोरा कर्तव्य ज्यान तथा शान्तिविरुद्धको कसुरसम्बन्धी मुद्दामा पुर्पक्षका लागि कारागार चलान भएका छन्।
पर्सा जिल्ला अदालतले शुक्रबार नसिर अहम्मद मन्सुरी र जाफिर अहम्मदलाई मुद्दाको अन्तिम फैसला नहुँदासम्म कारागारमा राख्न आदेश दिएको हो।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) चक्र मल्लले अदालतको आदेशअनुसार दुवै जनालाई कारागार चलान गरिएको जानकारी दिए।
उनीहरूमाथि आफ्नै सालीको हत्या गरेको आरोपमा प्रहरीमा मुद्दा दर्ता भएको थियो। उक्त घटनाको अनुसन्धानका क्रममा प्रहरीले केही साताअघि दुवै जनालाई पक्राउ गरेको थियो।
प्रहरीले अनुसन्धान पूरा गरी उनीहरूलाई अदालतमा पेस गरेपछि अदालतले उपलब्ध प्रमाण र अभियोगका आधारमा मुद्दाको अन्तिम टुंगो नलागेसम्म पुर्पक्षका लागि कारागारमा राख्ने आदेश दिएको हो।
अदालतको आदेशसँगै दुवै जना मुद्दाको अन्तिम फैसला नहुँदासम्म कारागारमै रहनेछन्। पुर्पक्षका लागि कारागार चलान हुनु दोषी ठहर हुनु भने होइन।




