काठमाडौं,२३ साउन । खाना पकाउने एलपी ग्यास कालोबजारी गरेको आरोपमा प्रहरीले भक्तपुरबाट एक जनालाई पक्राउ गरेको छ। पक्राउ पर्नेमा चाँगुनारायण नगरपालिका–२, दुवाकोटस्थित बारुदखाना चोकमा डेरा गरी बस्ने ५७ वर्षीय तुलसीराम त्वयना रहेका छन्। प्रहरीका अनुसार त्वयनाले उपभोक्तालाई प्रतिसिलिन्डर ७ हजार रुपैयाँका दरले एलपी ग्यास बिक्री गरिरहेको सूचना प्राप्त भएपछि उनलाई पक्राउ गरिएको हो। सूचनाका आधारमा प्रहरीले चेकजाँच तथा अनुगमन गर्दा उनको साथबाट तीन थान ग्यास सिलिन्डरसमेत नियन्त्रणमा लिएको जनाएको छ। पक्राउ परेका त्वयनामाथि कालोबजारीसम्बन्धी विषयमा थप अनुसन्धान भइरहेको जिल्ला प्रहरी परिसर भक्तपुरले जनाएको छ।