बीरगन्ज, २ फागुन । बीरगन्ज महानगरापालिका वडा नम्बर २० अपौनीमा ट्रकले ठक्कर दिँदा एक जना साइकल यात्रीको ज्यान गएको छ ।
सोमबारका राति करिब साढे ७ बजेतिर बहुअरीबाट परवानीपुरतर्फ गइरहेको बा प्र ०३–००१ ख १४१८ नम्बरको ट्रकले परवानीपुरबाट अपौनीस्थित घर फर्कदै गरेका बीरगन्ज २० अपौनी नागेन्द्र ठाकुरलाइ ट्रकले ठक्कर दिँदा मृत्यु भएको हो ।
अपौनी चोकबाट साइकललाई दायाँ मोड्दै गर्दा ठाकुरलाई ठक्कर दिएको प्रत्यक्षदर्शीले बताएका छन् । ठाकुर सडक किनारमा रहेको सिमेन्ट रेलिङमा च्याप्पिइ गम्भिर घाइते भएका थिए ।
प्रहरी उपरीक्षक कोमल शाह नेतृत्वको टोलीले उनलाई उद्दार गरेर नारायणी अस्पताल पु¥याएको थियो । चिकित्सक टोलीले ईसिजी लगायतको चेकजाँच पछि ठाकुरको मृत्यु भइसकेको घोषणा गरेका थिए ।
ट्रकसहित चालक मकवानपुरको थाहा नगरपालिका वडा नम्बर ४ पालुङ घर भएका ३३ वर्षीय रमेश गोम्बालाई प्रहरीले नियन्त्रणमा लिई थप अनुसन्धान गरिरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक दिपक गिरीले जानकारी दिए ।
स्थानीयले राति अबेरसम्म ड्राइपोर्ट–परवानीपुर सडक खण्ड अवरुद्ध गरेका थिए । उनीहरुले पीडित परिवारलाई उचित क्षतिपूर्तिको माग गरेका छन् ।
