वीरगंज,२५ माघ – राष्ट्रिय स्वतन्त्र पार्टी (रास्वपा) का पर्सा निर्वाचन क्षेत्र नं.–१ का उम्मेदवार हरि पन्तले पिपरा, लालपर्सा, भेडिहाइ र सोलखपुर क्षेत्रका मतदातासँग भेटघाट गरेका छन्।
भेटघाटका क्रममा स्थानीय मतदाताहरूले पन्तलाई विभिन्न स्थानमा टीका, माला तथा खादा लगाएर स्वागत गरेका थिए। स्वागत कार्यक्रममा सहभागी मतदाताहरूले मुलुकको अबको आशा राष्ट्रिय स्वतन्त्र पार्टी भएको उल्लेख गर्दै यसपटकको निर्वाचनमा पर्सा क्षेत्र नं.–१ बाट रास्वपालाई विजयी गराएर पठाउने प्रतिबद्धता व्यक्त गरेका छन्।
घरदैलो अभियानका क्रममा उम्मेदवार पन्तसँग स्थानीय नागरिकहरूले क्षेत्रका विभिन्न समस्या तथा गुनासाहरू पनि राखेका थिए। पन्तले ती समस्यालाई गम्भीरतापूर्वक सुन्दै समाधानका लागि पहल गर्ने प्रतिबद्धता जनाएका थिए।
घरदैलो कार्यक्रममा राष्ट्रिय स्वतन्त्र पार्टीका नेता तथा कार्यकर्ताहरू, स्थानीय युवा, महिला तथा सर्वसाधारणको उल्लेखनीय सहभागिता रहेको थियो।
