वीरगन्ज, ३ ज्येष्ठ
आज मदन भण्डारी – जीवराज आश्रित स्मृति दिवस । मदन र जीवराजलाई आदर्श नेता मान्ने नेपाल कम्युनिस्ट पार्टी (नेकपा) लगायतले विभिन्न कार्यक्रम गरी मनाउँदैछन् ।
एमालेका तत्कालीन महासचिव भण्डारी र संगठन विभाग प्रमुख आश्रितको २०५० ज्येष्ठ ३ गते आजकै दिन दासढुंगामा जीप दुर्घटनामा परी मृत्यु भएको थियो ।
मदन पत्नी विद्या भण्डारी राष्ट्रपति र उनका समकालीनले यतिबेला सत्ताको बागडोर सम्हालिरहेका छन् । तर, २६ वर्षअघिको रहस्मय जीप दुर्घटनाको तथ्य अहिलेसम्म सतहमा आउन सकेको छैन । दुर्घटनाका साक्षी जीप चालक अमर लामाको हत्यापछि यो दुर्घटना थप रहस्मय बनेको छ ।
नेता भण्डारीले जनताको बहुदलीय जनवादको विकास गर्नुभएको थियो । एमाले र माओवादी केन्द्र एकीकृत भएर निर्माण भएको पार्टी नेकपामा मदनले अघि सारेको जनताको बहुदलीय जनवादका बारेमा बहस भइरहेको छ ।
