बीरगंज, १४ जेठ — पप्पु कन्स्ट्रक्सनले ठेक्का पाएका ठुला पुल तथा सडक निर्माणका काम नगर्दा जनताहरुले सास्ती खेप्नुपरेको छ । सिरहा र धनुषा जोड्ने कमला नदीका साथै महोत्तरीको रातो नदी पुल र दुई वटा सडकको ठेक्का लिएको पप्पुले समयमा काम नसक्दा वर्षायाममा हिलो र गर्मियाममा धुलोले जनजीवन नराम्ररी प्रभावित भएको छ ।
५५ करोड रुपैयाँभन्दा बढीको लागतमा ४ वर्ष्भित्र निर्माण पुरा गर्ने शर्तमा ठेक्का पाएको पप्पुले ९ वर्ष सम्म पनि सिरहा र धनुषाको सिमा भएर बग्ने कमला नदी र सिरहा सप्तरीको सिमामा बग्ने बलान नदीको पुल नबन्दा स्थानिय बासिन्दा प्रभावित भएका हुन् । त्यस्तै महोत्तरीमा रामजानकी पथ, लोहारपट्टीदेखि पश्चिम रातु खोलामा पर्ने रातो पुल र जलेश्वर सदरमुकाम स्थित खाद्य संस्थानदेखि धिरापुर जाने सडक निर्माण पनि पप्पु कन्स्ट्रक्सनले ढिलासुस्ती गर्दा अलपत्र रहेका छन् ।
१४ करोड ६४ लाख ७४ हजार रुपैयाँमा ठेक्का सम्झौता गरेको पप्पुले चारवटा पिलर उठाएर काम अत्रपत्र छाडेको छ ।
रातु र कमलानदीको पुलमात्र नभएर महोत्तरीको प्रमुख सडक रामजानकी पथसमेत चार वर्षदेखि स्तरोन्नती हुन नसकेको स्थानियले बताएका छन् । जनकपुरधाम–मटिहानी १५ किलोमिटर सडकमध्ये ६ किमी सडक बने पनि उक्त सडक निर्माण नसकिँदै भत्किन थालेको छ । अन्य ६ किमी सडकसमेत जीर्ण अवस्थामा रहेको छ । २०७२ असार १३ मा स्तरोन्नति र कालोपत्रे गर्न ९ करोड ४७ लाख रुपैयाँमा ठेक्का लिए पनि कम्पनीले काम पुरा गर्न नसकेपछि पप्पुमार्फत ब्रदर्स कन्स्ट्रक्सनले काम गरिरहेको छ ।
महोत्तरी सदरमुकाम जलेश्वरको खाद्य संस्थानदेखि धिरापुर जाने सडक २०७२ असार ३१ मा ३ करोड ४९ लाख ६८ हजारमा ठेक्का लिएको पप्पुले सम्झौतामा ०७३ असार ३१ मा काम सक्ने सम्झौता भएतापनि हाल सम्म सडकमा केही प्रगति देखिएको छैन् । पप्पुले विभिन्न बहाना बनाएर दुई पटकसम्म म्याद थपेको छ । थप म्यादमा समेत काम सकेको छैन । खरिद ऐन नियमानुसार पप्पुले अधिकांस योजना सुरु गरेको देखाएर कुल लागतको २० प्रतिशत रकम झिके पनि भौतिक पूर्वाधार निर्माण अलपत्र पारेको सडक डिभिजन कार्यालयका प्रमुख बिनोद मौवारले बताउनुभयो ।
