काठमाडाै,१२ फागुन । भारतको राँचीबाट दिल्लीतर्फ जाँदै गरेको एक निजी एयर एम्बुलेन्स सोमबार साँझ दुर्घटनाग्रस्त हुँदा त्यसमा सवार सबै सात जनाको मृत्यु भएको छ। दुर्घटना चतरा जिल्ला क्षेत्रमा भएको हो।
भारतीय नागरिक उड्डयन महानिर्देशनालयले दुर्घटनाको पुष्टि गरेको छ। प्रारम्भिक विवरणअनुसार विमानले राँचीस्थित बिरसा मुन्डा विमानस्थलबाट साँझ ७:११ बजे मेडिकल उडान भरेको थियो। उडान भरेको केही समयपछि नै विमानसँगको राडार र रेडियो सम्पर्क विच्छेद भएको थियो। कोलकाता एयर ट्राफिक कन्ट्रोलसँग विमानको अन्तिम सम्पर्क साँझ ७:३४ बजे भएको जनाइएको छ।
सम्पर्क टुटेको करिब आधा घण्टापछि उद्धार समन्वय केन्द्र सक्रिय पारिएको थियो। खोजी तथा उद्धार टोली दुर्घटनास्थलमा पुग्दा विमानमा सवार सबै जनाको घटनास्थलमै मृत्यु भइसकेको पुष्टि भएको थियो।
दुर्घटनामा मृत्यु हुनेहरूमा दुई चालक दलका सदस्य क्याप्टेन विवेक विकास बिलागत र क्याप्टेन सवरदीप सिंह रहेका छन्। साथै बिरामी सञ्जय कुमार, कुरुवा अर्चना देवी र धुरु कुमारको पनि ज्यान गएको छ। त्यस्तै डाक्टर विकास कुमार गुप्ता र प्यारामेडिक सचिन कुमार मिश्र पनि दुर्घटनामा परेर मृत्यु भएको पुष्टि भएको छ।
दुर्घटनाको कारण पत्ता लगाउन एयरक्राफ्ट एक्सिडेन्ट इन्भेस्टिगेसन ब्यूरोले विस्तृत अनुसन्धान सुरु गरेको छ। अधिकारीहरूले प्राविधिक समस्या वा अन्य सम्भावित कारणबारे अध्ययन भइरहेको बताएका छन्।
