काठमाडौं,०२ चैत । भारतको कटक स्थित श्रीराम चन्द्र भञ्ज मेडिकल कलेज अस्पताल मा आइतबार राति भएको भीषण आगलागीमा परी १० जना बिरामीको मृत्यु भएको छ भने ११ जना स्वास्थ्यकर्मी घाइते भएका छन्।
राति करिब ३ बजे अस्पतालको पहिलो तलामा रहेको ट्रमा केयर आईसीयूबाट आगो सुरु भएको बताइएको छ। छोटो समयमै आगो फैलिँदा ७ जनाको घटनास्थलमै मृत्यु भएको थियो भने अन्य ३ जनाको उपचारका क्रममा ज्यान गएको जनाइएको छ। आगलागी भएको समयमा उक्त आईसीयू कक्षमा २३ जना बिरामी भर्ना रहेका थिए।
बिरामीहरूलाई सुरक्षित स्थानमा सार्ने प्रयासका क्रममा ११ जना स्वास्थ्यकर्मी जलेर घाइते भएका छन्। प्रारम्भिक अनुसन्धानअनुसार विद्युत् सर्टका कारण आगलागी भएको हुन सक्ने अनुमान गरिएको छ।
घटनापछि मोहन चरण माझी सोमबार बिहान अस्पताल पुगेर घाइतेहरूको अवस्थाबारे जानकारी लिएका छन्। उनले मृतकका परिवारलाई प्रतिपरिवार २५ लाख भारतीय रुपैयाँ राहत दिने घोषणा गर्दै घटनाको उच्चस्तरीय छानबिन गर्न निर्देशन दिएका छन्।
अस्पतालजस्तो संवेदनशील स्थानमा हुने यस्ता आगलागीका घटनाले सुरक्षा व्यवस्था र अग्नि नियन्त्रण प्रणालीमाथि गम्भीर प्रश्न उठाएको छ। यसअघि पनि सन् २०२५ को अक्टोबरमा सवाई मानसिंह अस्पताल, जयपुर मा भएको आगलागीमा ८ जनाको ज्यान गएको थियो।
स्वास्थ्य संस्थाहरूमा आपत्कालीन सुरक्षा पूर्वाधार र अग्नि नियन्त्रण प्रणालीको प्रभावकारिताबारे पुनः बहस सुरु भएको छ।
