जनकपुर,२० मंसिर । सात दलीय गठबन्धनमा जारी राजनीतिक सम्हालपश्चात नेपाली कांग्रेसले मधेश प्रदेशको मुख्यमन्त्रीपदमा सफलता हासिल गरेको छ। कांग्रेसका कृष्णप्रसाद यादव प्रदेशका नवनियुक्त मुख्यमन्त्री बन्ने भएका छन्।
यादवको नियुक्तिसँगै सात दलीय गठबन्धनभित्र सभामुख पद र मन्त्रिमण्डल विस्तारका विषयमा वार्ता सुरु भएको छ। स्रोतका अनुसार मुख्यमन्त्री कांग्रेसले पाए पनि सभामुख पद लगभग पक्का रुपमा जसपा नेपाललाई जाने देखिन्छ।
नेकपा माओवादी केन्द्रका प्रदेश संसदीय दलका नेता भरतप्रसाद साहले आइतबारसम्म प्याकेजमै सबै विषयमा सहमति हुने दाबी गरेका छन्। उनका अनुसार, सभामुख पददेखि विभिन्न मन्त्रालयसम्मका विषय सात दलीय गठबन्धनको बैठकमा टुंगो लाग्नेछ।
स्रोतका अनुसार, मुख्यमन्त्री कांग्रेसले पाएपछि जसपा नेपालले सभामुख पदका साथै भौतिक पूर्वाधार विकास मन्त्रालयमा दाबी गरेको छ। त्यस्तै, जनमत पार्टीले अर्थ मन्त्रालय पाउने दाबी गरेको छ।
नवनियुक्त मुख्यमन्त्री यादव आइतबार शपथ ग्रहण गर्ने कार्यक्रम रहेको छ। त्यसपछि मन्त्रिमण्डल गठन र सभामुखको टुंगो लाग्ने अपेक्षा गरिएको छ।
सात दलीय गठबन्धनसँग मधेश प्रदेश सभामा दुई तिहाईभन्दा बढी मत बलियो रहेको छ। यादवलाई कांग्रेससहित जसपा नेपाल, जनमत पार्टी, नेकपा माओवादी केन्द्र, लोसपा नेपाल, नेकपा एकीकृत समाजवादी र नागरिक उन्मुक्ति पार्टीको समर्थन प्राप्त छ।
सात दलीय गठबन्धनमा सदस्य संख्या यसप्रकार छ: कांग्रेस २२, जसपा नेपाल १९, जनमत पार्टी १३, माओवादी केन्द्र ९, लोसपा नेपाल ८, नेकपा एकीकृत समाजवादी ७ र नागरिक उन्मुक्ति पार्टी १ गरी जम्मा ७८ जना प्रदेश सांसद। विरोधी दल नेकपा एमालेका २५ र संघीय समाजवादी पार्टीका १ सांसद मात्रै छन्।
