काठमाडाै,२६ चैत । पाकिस्तान ले अमेरिका–इरानबीच हुन लागेको उच्चस्तरीय वार्ताको पूर्वसन्ध्यामा राजधानी इस्लामाबाद मा दुई दिनको आकस्मिक स्थानीय बिदा घोषणा गरेको छ।
बिहीबारदेखि लागू हुने गरी गरिएको उक्त निर्णयलाई सुरक्षा तयारीसँग जोडेर हेरिएको छ। इस्लामाबाद जिल्ला प्रशासनले औपचारिक कारण नखुलाए पनि यस्ता संवेदनशील कूटनीतिक गतिविधिअघि सुरक्षा कडाइ गर्ने अभ्यासअनुसार यो कदम चालिएको मानिएको छ।
अमेरिका र इरानबीचको वार्ता यसै सप्ताहन्त इस्लामाबादमा हुने तयारी रहेको छ। ह्वाइट हाउसका अनुसार अमेरिकी उपराष्ट्रपति जेडी भान्स नेतृत्वको टोली वार्तामा सहभागी हुने कार्यक्रम रहेको छ। उक्त वार्तालाई मध्यपूर्व क्षेत्रको तनाव न्यूनीकरणसँग जोडेर महत्वपूर्ण रूपमा हेरिएको छ।
घोषित बिदा बिहीबार र शुक्रबार इस्लामाबाद क्षेत्रमा मात्र लागू हुनेछ। यस अवधिमा सरकारी तथा निजी कार्यालयहरू बन्द रहनेछन्, जसले राजधानीको दैनिक गतिविधिमा असर पार्ने अपेक्षा गरिएको छ।
यद्यपि, अस्पताल, सुरक्षा निकाय, विद्युत् र ग्यास सेवा जस्ता अत्यावश्यक सेवाहरू भने नियमित सञ्चालनमा रहने प्रशासनले स्पष्ट पारेको छ।
विश्लेषकहरूले यस कदमलाई पाकिस्तानले अन्तर्राष्ट्रिय कूटनीतिक भूमिकामा आफूलाई सक्रिय रूपमा प्रस्तुत गर्ने प्रयासका रूपमा पनि व्याख्या गरेका छन्।
