बीरगन्ज,१६ साउन । सशस्त्र प्रहरीले बाराका विभिन्न स्थानबाट करीव ८ लाख रुपैयाँ मूल्य बराबरका अवैध सामान बरामद गरेको छ। सशस्त्र प्रहरी बल नम्बर १२ गण बाराका प्रहरी उपरीक्षक खुमबहादुर के.सी.का अनुसार बरामद गरिएका सामानहरू बीरगन्ज भन्सार कार्यालयमा बुझाइएको छ।
शुक्रबार बिहान पचरौता नगरपालिका–७, बेनौलिबाट एक मोटरसाइकलसहित कम्प्युटर पार्ट्स बरामद गरिएको छ। उक्त सामानको अनुमानित मूल्य ६ लाख ३७ हजार रुपैयाँ रहेको प्रहरीले जनाएको छ।
त्यस्तै, बिश्रामपुर गाउँपालिकाको घोडासन, बलिरामपुर र मुसर्वा सीमाक्षेत्रबाट जुत्ता–चप्पल, तन्ना, महिलाको कुर्ता र ट्र्याक्टर पार्ट्ससहित करिब १ लाख ५० हजार रुपैयाँ बराबरका सामान बरामद गरिएको छ।
यस्तै, सिम्रौनगढ नगरपालिका–६, अमरपुरबाट मोबाइल टेम्पर ग्लास बरामद गरिएको छ, जसको अनुमानित मूल्य ३५ हजार रुपैयाँ रहेको छ।
सशस्त्र प्रहरीले सीमावर्ती क्षेत्रमा तस्करीविरुद्ध निगरानी कडा बनाएको जनाएको छ।
