वीरगञ्ज, १६ भदौ – गृहमन्त्री रमेश लेखकले नेपाली कांग्रेस र एमालेबीचको गठबन्धनको मुख्य प्राथमिकता सरकारको स्थिरता रहेको बताएका छन् । नेपाल प्रेस युनियन पर्साले वीरगञ्जमा आयोजना गरेको पत्रकार सम्मेलनमा बोल्दै मन्त्री लेखकले सरकार आफ्नो प्राथमिकतामा सफल भएको दाबी गरे ।
स्थिर सरकार भएपछि केही उपलब्धिहरू हासिल गर्न सकिन्छ भन्ने कुरा हालको गठबन्धन सरकारले प्रमाणित गरेको उनले बताए । लामो समयदेखि रोकिएका केही विधेयक तथा कानुन संसद्मा प्रस्तुत गर्न सरकारले सफलता हासिल गरेको र नागरिकता सम्बन्धी ऐन संशोधन गर्न पनि सफल भएको उल्लेख गरे ।
प्रधानमन्त्री केपी शर्मा ओलीले मित्रराष्ट्र चीनको भ्रमणका क्रममा नेपाल–भारत सीमासम्बन्धी विवादको विषय उठाएर सही कार्य गरेको उनको भनाइ थियो । कालापानी, लिपुलेक र लिम्पियाधुरा नेपालको भूमि भएको पुनः दोहोर्याउँदै उनले “आफ्नो भूमि आफ्नो हो भन्नु मित्रराष्ट्रलाई चित्त दुखाउने कुरा होइन” भने । भारतसँगको सम्बन्धमा यसले कुनै असर नपर्ने गृहमन्त्री लेखकको तर्क थियो । आफ्नो भुभीलाई आफ्नो हो भन्दैमा छिमिकेसँग सम्बन्ध नविग्रिने मन्त्री लेखक दावी गरे ।
पत्रकारले सोधेको प्रश्नको जवाफ दिँदै मन्त्री लेखकले “भिसा प्रकरणमा दोष अरूलाई थुत्र्याउन मलाई लक्षित गरिएको हो” भन्दै दोषी को हो भन्ने कुरा जनताले बुझिसकेका छन् भने । भिसा विवादमा अख्तियार दुरुपयोग अनुसन्धान आयोगले अनुसन्धान गरिरहेको र छानबिनका लागि उच्चस्तरीय समिति समेत गठन गरिएको बताउँदै उनले प्रतिवेदन आएपछि धेरै कुरा प्रष्ट हुने बताए । “कसैले राजीनामा देऊ भनेर दिनु पर्ने होइन ” उनले भने ।
त्यस्तै, वीरगञ्जमा देखिएको हैजाको प्रकोप नियन्त्रणका लागि सरकार गम्भीर रहेको र आवश्यक परे सेना समेत परिचालन गर्ने तयारी गरिएको उनले बताए । नेपाल प्रेस युनियन पर्साका अध्यक्ष विजय चौहानको अध्यक्षतामा दियालो लज होटलमा सम्पन्न पत्रकार सम्मेलनमा नेपाली कांग्रेसका केन्द्रीय सदस्य अनिल रुंगटा, मधेस प्रदेशका कृषिमन्त्री जनार्दन सिंह क्षेत्री, पूर्वमन्त्री सुरेन्द्रप्रसाद चौधरी र ओमप्रकाश शर्मा लगायतको उपस्थिति थियो ।
