काठमाडाैं,०६ फागुन । भारी चुनावी विजयपछि बङ्गलादेशका प्रधानमन्त्री तारिक रहमान ले ५० सदस्यीय मन्त्रिपरिषद् घोषणा गरेका छन्। सन् २०२४ को विद्रोहपछि अन्तरिम प्रशासनमार्फत सञ्चालन हुँदै आएको शासन व्यवस्थापछि उनले औपचारिक रूपमा पदभार सम्हाल्दै नयाँ सरकार गठन गरेका हुन्।
राजपत्रमार्फत सार्वजनिक गरिएको मन्त्रिपरिषद् सूचीअनुसार ७६ वर्षीय अमिर खसरु महमुद चौधरी लाई वित्त मन्त्रालयको जिम्मेवारी दिइएको छ। पूर्व वाणिज्य मन्त्रीसमेत रहेका चौधरीलाई राजनीतिक अस्थिरतापछि लगानीकर्ताको विश्वास पुनःस्थापित गर्दै संकटग्रस्त अर्थतन्त्र सुधार गर्ने जिम्मेवारी दिइएको छ।
नयाँ सरकार गठनसँगै प्रधानमन्त्री रहमानले रक्षा मन्त्रालय आफैं सम्हालेका छन्। लामो समयदेखि राजनीतिक प्रतिस्पर्धाले ध्रुवीकृत बनेको समाजलाई एकताबद्ध गर्ने, आन्तरिक सुरक्षा सुदृढ बनाउने तथा क्षेत्रीय चुनौती सामना गर्ने प्रमुख दायित्व उनको अगाडि रहेको छ। भारतसँगको सीमा तनाव र म्यान्मामा जारी द्वन्द्वको प्रभावका बीच नयाँ मन्त्रिपरिषद् गठन भएको हो। बङ्गलादेशमा म्यान्माबाट आएका १० लाखभन्दा बढी रोहिङ्ग्या शरणार्थी आश्रित रहेको बताइएको छ।
विदेश मन्त्रालयको जिम्मेवारी अनुभवी कूटनीतिज्ञ खलीलुर रहमान लाई दिइएको छ। संयुक्त राष्ट्रसंघका पूर्व अधिकारी रहेका उनले क्षेत्रीय कूटनीतिक सन्तुलन कायम राख्ने जिम्मेवारी पाएका छन्। यसैबीच भारतका विदेशमन्त्री सुब्रह्मण्यम जयशङ्कर ले नयाँ सरकारलाई बधाई दिँदै दुई देशबीच सहकार्य अघि बढाउने प्रतिबद्धता व्यक्त गरेका छन्।
प्रधानमन्त्री रहमानले बुधबार पहिलो मन्त्रिपरिषद् बैठकको अध्यक्षता गर्ने अपेक्षा गरिएको छ। नयाँ सरकार गठनसँगै अर्थतन्त्र पुनरुत्थान, सामाजिक सद्भाव सुदृढीकरण र क्षेत्रीय सम्बन्ध सन्तुलनमा राख्ने कार्य औपचारिक रूपमा सुरु भएको जनाइएको छ।
