काठमाडौं,२२ वैशाख । स्मार्ट टेलिकमका तत्कालीन प्रबन्ध निर्देशक सर्वेश जोशी पक्राउ परेका छन् । ठगी तथा आपराधिक विश्वासघातसम्बन्धी आरोपमा केन्द्रीय अनुसन्धान ब्युरो (सीआईबी) ले उनलाई नियन्त्रणमा लिएको हो ।
सीआईबीका अनुसार जोशीलाई सोमबार काठमाडौं महानगरपालिका–२ खुर्सानीटार क्षेत्रबाट पक्राउ गरिएको हो ।
स्मार्ट टेलिकमको अनुमति पत्र नवीकरण नभएपछि २०८० वैशाख ३ गतेदेखि कम्पनीको लाइसेन्स स्वतः खारेज भएको थियो । त्यसपछि कम्पनीको सम्पत्ति नेपाल दूरसञ्चार प्राधिकरणले आफ्नो नियन्त्रणमा लिएको थियो ।
तर, सरकारी नियन्त्रणमा रहेको सम्पत्तिमा अनियमितता गरी सरकारको हकहितमा क्षति पुर्याउने गतिविधिमा संलग्न भएको आरोपमा जोशीमाथि अनुसन्धान अघि बढाइएको सीआईबीले जनाएको छ ।
घटनाबारे थप अनुसन्धान जारी रहेको प्रहरीले बताएको छ ।
