रावलपिन्डी,२७ असार । पाकिस्तानको रावलपिन्डी शहरमा एक १६ वर्षीया किशोरीको हत्या केवल टिकटक खाता नहटाएको कारणले भएको छ। आफ्नी छोरीले टिकटक खाता मेट्न अस्वीकार गरेपछि बाबुले गोली हानी हत्या गरेको प्रहरी रिपोर्टमा उल्लेख छ।
प्रहरी प्रवक्ताका अनुसार, बुबाले छोरीलाई सामाजिक सञ्जालको खाता हटाउन बारम्बार आग्रह गरेका थिए, तर अस्वीकार भएपछि उनले ‘सम्मानका लागि’ हत्या गरे। प्रारम्भमा परिवारले घटनालाई ‘आत्महत्या’ को रूपमा देखाउन खोजेको भए पनि अनुसन्धानपछि बाबुलाई पक्राउ गरिएको हो।
यो घटना पाकिस्तानमा पुनः एकपटक महिलामाथिको सामाजिक नियन्त्रण र अनलाइन अभिव्यक्तिमा हस्तक्षेपको बहसलाई चर्काइरहेको छ। पाकिस्तानमा महिलाहरू सामाजिक सञ्जालमार्फत आफ्नो आवाज, पहिचान र आयको स्रोत निर्माण गर्दै आएका छन्, तर अझै पनि उनीहरू पारिवारिक तथा सामाजिक हिंसाबाट असुरक्षित छन्।
यो घटना पहिलो होइन। केही हप्ताअघि मात्र १७ वर्षीया टिकटक इन्फ्लुएन्सर सना युसुफको पनि गोली हानी हत्या गरिएको थियो, जब उनले एक व्यक्तिको प्रस्ताव अस्वीकार गरेकी थिइन्। सना युसुफसँग १० लाखभन्दा बढी फलोअर्स थिए, र उनले आफ्नो जीवनशैली र रुचिहरू टिकटकमार्फत प्रस्तुत गर्थिन्।
टिकटक पाकिस्तानमा निकै लोकप्रिय भए पनि त्यहाँ महिलामाथिको डिजिटल पहुँच सीमित छ। मोबाइल जेंडर ग्याप रिपोर्ट २०२५ अनुसार पाकिस्तानमा मात्र ३० प्रतिशत महिलासँग स्मार्टफोन छन्, जुन पुरुषहरूको तुलनामा अत्यन्त न्यून हो।
पाकिस्तानी दूरसञ्चार अधिकारीहरूले ‘अनैतिक’ मानिने सामग्री हटाउने नाममा टिकटकमाथि बारम्बार प्रतिबन्ध लगाउने वा धम्की दिने गरेका छन्। तर वास्तविकता भने यो हो कि ग्रामीण समाजमा अझै पनि पुरातन सोच र ‘इज्जत’ को नाममा हिंसा गर्ने प्रवृत्ति कायमै छ।
