काठमाडौँ,०५ पुस । जाडो याम सुरु भएसँगै अधिकांश मानिस तातो चिया, कफी वा सूपतर्फ आकर्षित हुने गर्छन् । तर मौसम जुनसुकै भए पनि कागती पानी स्वास्थ्यका दृष्टिले लाभदायी पेय पदार्थका रूपमा लिन सकिन्छ । कागतीमा पाइने भिटामिन सी, एन्टिअक्सिडेन्ट र शरीर सफा गर्ने गुणले चिसो मौसममा पनि शरीरलाई सक्रिय र तन्दुरुस्त राख्न सहयोग गर्छ ।
विशेषगरी जाडो मौसममा रोग प्रतिरोधात्मक क्षमता कमजोर हुने भएकाले कागती पानी उपयोगी मानिन्छ । यसमा रहेको प्रशस्त भिटामिन सीले रुघाखोकी, ज्वरो तथा विभिन्न संक्रमणको जोखिम कम गर्न मद्दत गर्छ । मनतातो पानीमा कागती मिसाएर सेवन गर्दा शरीरभित्र जम्मा भएका विषाक्त तत्व बाहिर निकाल्न सहयोग पुग्ने र मेटाबोलिजम सक्रिय हुने चिकित्सकहरू बताउँछन् ।
चिसो मौसममा पाचन प्रक्रिया सुस्त हुने हुँदा ग्यास, कब्जियत र पेट फुल्ने समस्या देखिन सक्छ । यस्तो अवस्थामा कागती पानीले पाचन प्रणालीलाई सहज बनाउने भूमिका खेल्छ । बिहान खाली पेटमा मनतातो कागती पानी पिउँदा बोसो घटाउन मद्दत पुग्ने भएकाले तौल नियन्त्रण गर्न चाहनेहरूका लागि पनि यो लाभदायी मानिन्छ ।
जाडोमा छाला सुक्खा र निस्तेज हुने समस्या सामान्य हो । कागती पानीले शरीरमा आवश्यक पानीको मात्रा कायम राख्न मद्दत गर्ने र छालामा प्राकृतिक चमक ल्याउन सहयोग पुर्‍याउने विश्वास गरिन्छ ।
यद्यपि, कागती पानी सेवन गर्दा केही सावधानी अपनाउन आवश्यक छ । धेरै चिसो पानीमा कागती मिसाएर पिउँदा घाँटी दुख्ने वा रुघाखोकी बढ्न सक्ने भएकाले सधैँ मनतातो पानी प्रयोग गर्नु उपयुक्त हुन्छ । खाली पेटमा कागती पानी पिउँदा केही व्यक्तिमा एसिडिटी वा पेट पोल्ने समस्या देखिन सक्ने भएकाले शरीरको अवस्था अनुसार मात्र सेवन गर्नुपर्छ ।
कागतीको अम्लीय गुणले दाँतको इनामेल कमजोर बनाउन सक्ने भएकाले स्ट्र प्रयोग गरेर पिउनु वा सेवनपछि सफा पानीले मुख कुल्ला गर्नु राम्रो मानिन्छ । साथै, अत्यधिक मात्रामा कागती पानी पिउनु हानिकारक हुन सक्ने भएकाले ठिक्क मात्रामा र नियमित तरिकाले सेवन गर्नु नै स्वास्थ्यका लागि उत्तम उपाय हो ।