बीरगन्ज,१२ माघ । जिल्ला प्रहरी कार्यालय पर्साले भन्सार छली अवैध रूपमा भण्डारण गरिएको करिब ३० लाख मूल्य बराबरको स्टेसनरी तथा खुद्रा सामान बरामद गरेको छ।
विशेष सूचनाका आधारमा माघ ११ गते राति करिब ८:०० बजे बीरगन्ज महानगरपालिका वडा नं. ७, रेल्वे सडकखण्डस्थित गोदाममा प्रहरी टोलीले छापा मारेको थियो। बरामद गरिएको गोदाम विकाश गोयलले सञ्चालन गरेको र बिन्दु गोयलको नाममा दर्ता रहेको एस.बी. ट्रेडिङको रहेको प्रहरीले जनाएको छ।
बरामद सामानहरूमा पेन्सिल, इरेजर, कटर, रबर, तास, टेप, बेलुन, लाइटर, जिभिया, गुच्चा लगायतका विभिन्न खुद्रा सामान समावेश छन्।
जिल्ला प्रहरी कार्यालय र वडा प्रहरी कार्यालय विर्ताबाट खटिएको संयुक्त टोलीले कानुनी प्रक्रिया पूरा गरी ती सामानहरू नियन्त्रणमा लिएको छ। बरामद सामग्रीहरू आवश्यक कारबाहीका लागि राजस्व अनुसन्धान कार्यालयमा बुझाउने प्रक्रिया भइरहेको प्रहरी प्रवक्ता नायब उपरीक्षक हरि बहादुर बस्नेतले जानकारी दिनुभएको छ।
