काठमाडौँ, १३ पुस । भारत–चीन सीमाना नजिकै अरुणाञ्चल प्रदेशमा अलपत्र परेका १४ नेपालीको उद्धार गरिएको छ। जुम्लाको चन्दननाथ नगरपालिका मिचा गाउँका उनीहरूलाई ठेकेदारले ‘काम मिलाइदिन्छु’ भन्दै अरुणाञ्चल पुर्याएको थियो ।
पीडितहरूले ठेकेदारले काठमाडौँ, सिक्किम, र दार्जिलिङमा काम दिने भन्दै अरुणाञ्चल लगेको र त्यसपछि सम्पर्कविहीन भएको बताएका छन्। उद्धार गरिएका व्यक्तिहरूमा ६४ वर्षीय वृद्धसमेत रहेका छन् ।
नेकपा (माओवादी केन्द्र) जुम्लाकी सांसद छिरिङ ल्हामु लामाको पहल र महेशजंग शाहीसँगको समन्वयमा उनीहरूलाई उद्धार गरिएको हो। सांसद लामाले अलपत्र परेकाहरूलाई नेपाल फर्काउन आवश्यक आर्थिक व्यवस्थासमेत गरिएको जानकारी दिइन् ।
उद्धारपछि सबैलाई जुम्ला फर्काउन तयारी भइरहेको छ। यो घटनाले ठेकेदारहरूको प्रलोभन र विदेशमा हुने शोषणप्रति सजग रहनुपर्ने आवश्यकतालाई उजागर गरेको छ ।
पीडितहरूले भिडियोमार्फत आफ्नो दु:खद अवस्था सार्वजनिक गरेपछि यो घटना प्रकाशमा आएको थियो। उद्धारपछि उनीहरूलाई सुरक्षित रूपमा घर फर्काउने काम अघि बढाइएको छ ।
