काठमाडौं,२३ जेठ । अमेरिकी सहायता निकाय यूएस एड (USAID) अन्तर्गतका कार्यक्रमहरू बन्द भएपछि त्यस संस्थाले प्रयोग गर्दै आएका सयौँ सवारी साधनहरू काठमाडौंको चोभारस्थित सुख्खा बन्दरगाहमा थन्किएका छन्।
अमेरिकी पूर्वराष्ट्रपति डोनाल्ड ट्रम्पको पालामा गरिएको नीतिगत निर्णयअनुसार यूएस एडमार्फत हुने वैदेशिक सहायता कार्यक्रमहरू बन्द गरिँदा नेपालमा क्रियाशील थुप्रै परियोजनामा प्रत्यक्ष असर परेको थियो। सोही कारण यूएस एडले प्रयोग गरेका गाडी, मोटरसाइकललगायतका सम्पत्ति हाल लावारिस अवस्थामा देखिएका छन्।
सुख्खा बन्दरगाह प्रशासनका अनुसार यी गाडी र मोटरसाइकलहरूको सटीक संख्या अझै यकिन नभए पनि, सयौँको संख्यामा सवारी साधनहरू थन्किएको बताइएको छ। तर, यी साधनहरू कसरी व्यवस्थापन गरिने भन्ने विषयमा हालसम्म कुनै स्पष्ट नीति वा योजना सार्वजनिक भइसकेको छैन।
पूर्वराष्ट्रपति ट्रम्पले “अमेरिकी करदाताको पैसाको दुरुपयोग” भएको भन्दै यूएस एडलाई बन्द गर्ने निर्णय गरेका थिए। उक्त निर्णयसँगै नेपालसहितका धेरै विकासशील मुलुकमा यूएस एडको सहायतामा चलिरहेका कार्यक्रमहरू स्थगित वा बन्द भएका थिए।
हाल नेपालमा छोडिएका यूएस एडका सवारी साधनहरू सरकारी स्वामित्वमा हस्तान्तरण गरिने कि नीलामीमा लगिने भन्ने विषयमा बहस चलिरहेको देखिन्छ। अर्थ मन्त्रालय वा सम्बन्धित निकायको स्पष्ट निर्णय नहुँदा यी सम्पत्ति अलपत्र अवस्थामा चोभारको बन्दरगाहमा थन्किएर बिग्रन थालेका छन्।
