काठमाडौं,२९ जेठ । बंगलादेशको अन्तरिम सरकारका प्रमुख मुहम्मद युनुसले पूर्व प्रधानमन्त्री शेख हसिनालाई भारतीय भूमिबाट राजनीतिक अभिव्यक्ति दिन प्रतिबन्ध लगाउने आफ्नो मागलाई भारतीय प्रधानमन्त्री नरेन्द्र मोदीले बेवास्ता गरेको आरोप लगाएका छन् । युनुसले बुधबार (जेठ २८ गते) लन्डनको चथम हाउसमा आयोजित एक कार्यक्रममा बोल्दै सो कुरा बताएका हुन् ।
युनुसका अनुसार, गत अप्रिलमा बैंककमा सम्पन्न बिमस्टेक शिखर सम्मेलनका क्रममा प्रधानमन्त्री मोदीसँग भएको द्विपक्षीय बैठकमा उनले शेख हसिनालाई भारतीय भूमिबाट बंगलादेशको आन्तरिक मामिलामा राजनीतिक बयानबाजी गर्नबाट रोक्नका लागि आग्रह गरेका थिए । चथम हाउसमा बोल्दै युनुसले शेख हसिनालाई भारतबाट सुपुर्दगी गराउने प्रयासहरू जारी रहने पनि स्पष्ट पारे । शेख हसिना हाल भारतमा राजनीतिक शरण लिएर बसिरहेकी छन् र उनले त्यहीँबाट बंगलादेशको राजनीतिबारे टिप्पणी गर्दै आएकी छन् ।
मोहम्मद युनुसले भारतसँग सुमधुर सम्बन्ध कायम राख्ने बंगलादेशको चाहना व्यक्त गरे । “हामी भारतसँग धेरै राम्रो सम्बन्ध राख्न चाहन्छौं। यो हाम्रो छिमेकी हो,” उनले भने, “हामी उनीहरूसँग कुनै समस्या चाहँदैनौं तर भारतीय प्रेसको नक्कली समाचारका कारण सधैं कुनै न कुनै समस्या उत्पन्न हुन्छ।” उनले थपे, “यसले बंगलादेशलाई आशंकित र क्रोधित बनाउँछ। हामी यसलाई नियन्त्रण गर्न धेरै प्रयास गर्छौं तर साइबरस्पेसमा धेरै कुराहरू हुन्छन् र हामी यसबाट टाढा रहन सक्दैनौं।”
अन्तरिम सरकारका प्रमुख युनुसले बंगलादेशमा शान्ति र स्थिरता कायम गर्नु नै यस समयमा आफ्नो प्रमुख प्राथमिकता रहेको बताए । “हामी शान्त रहन प्रयास गर्छौं, अचानक केहि हुन्छ र त्यसपछि रिस फर्कन्छ। यस समयमा हाम्रो लागि सबैभन्दा ठूलो काम शान्ति स्थापना गर्नु हो,” उनले भने । युनुसको यो भनाइले बंगलादेशको अन्तरिम सरकार र भारतबीचको सम्बन्धमा आउन सक्ने सम्भावित जटिलता र शेख हसिनाको भारतमा उपस्थितिलाई लिएर बंगलादेशमा बढ्दो चासोलाई उजागर गरेको छ ।
