बीरगन्ज,१३ असोज । पर्साको ठोरी गाउँपालिका–५ सुवर्णपुरका ७३ वर्षीय निरे लोप्चन हराएको पाँच दिनपछि मृत अवस्थामा फेला परेका छन्।
असोज ९ गते बिहान घरबाट बजारतर्फ गएका उनी फर्किन नआएपछि परिवार र स्थानीयले निरन्तर खोजी गर्दै आएका थिए। आइतबार साँझ सुवर्णपुर आठघरे नजिकैको खोल्सामा उनको शव सडेगलेको अवस्थामा भेटिएको वडाध्यक्ष अस्ट बहादुर लोप्चनले जानकारी दिए।
शवको अनुहार र घाँटीको मासु लुछिएको देखिएकाले जंगली जनावरको आक्रमणबाट ज्यान गएको आशंका गरिएको छ। करिब एक वर्षअघि सोही खोल्सामा बाघको आक्रमणमा एक स्थानीयको मृत्यु भएको घटना स्मरणीय भएकाले गाउँलेहरूले पनि त्यसै क्षेत्रलाई खोजी केन्द्र बनाएका थिए।
घटनास्थलमा प्रहरी र पर्सा राष्ट्रिय निकुञ्जका कर्मचारीले स्थलगत अनुसन्धान गरिरहेका छन्। शवलाई पोस्टमार्टमका लागि वीरगञ्ज पुर्याउने तयारी भइरहेको छ। वास्तविक कारण भने विस्तृत अनुसन्धानपछि मात्रै प्रस्ट हुने प्रहरीले जनाएको छ।
