वीरगञ्जको रेल्वे रोडस्थित एसबी ट्रेडिङ मा प्रहरीले छापा मारेर करिब २५ देखि ३० लाख रुपैयाँ बराबरका अवैध सामान बरामद गरेको छ।
आइतबार साँझ करिब ५:३० बजे वडा प्रहरी कार्यालय बिर्ताबाट खटिएको प्रहरी टोलीले पसलमा छापा मारेको हो। प्रहरी निरीक्षक बिक्रम सुबेदीको नेतृत्वमा गएको टोलीले भन्सार छली ल्याइएका हुन सक्ने चिनियाँ, भारतीय तथा विभिन्न घरेलु प्रयोजनका सामानहरू नियन्त्रणमा लिएको जनाएको छ।
प्रहरीका अनुसार ती सामानहरू अवैध रूपमा भण्डारण तथा बिक्री वितरण भइरहेको सूचनाका आधारमा छापा मारिएको हो। प्रारम्भिक मूल्याङ्कन अनुसार बरामद सामानहरूको बजार मूल्य करिब २५ लाखदेखि ३० लाख रुपैयाँ बराबर रहेको छ।
हाल बरामद सबै सामानहरू वडा प्रहरी कार्यालय बिर्ताको नियन्त्रणमा राखिएको छ भने घटनाबारे थप अनुसन्धान भइरहेको प्रहरीले जनाएको छ। आवश्यक कागजात प्रस्तुत हुन नसके कानुनी प्रक्रिया अघि बढाइने र सम्बन्धित निकायसँग समन्वय गरी थप कारबाही गरिने प्रहरीले जानकारी दिएको छ।
यस घटनाले वीरगञ्ज क्षेत्रमा अवैध कारोबार नियन्त्रणका लागि प्रहरी सक्रिय रूपमा लागिरहेको संकेत दिएको स्थानीयवासीहरूले बताएका छन्।
