नवलपरासी,१२ माघ । नवलपरासी (बर्दघाट सुस्ता पूर्व) को देवचुली नगरपालिका–१ केउरेनीमा विद्यालय बसको ठक्करबाट चार वर्षीया बालिकाको मृत्यु भएको छ।
जिल्ला प्रहरी कार्यालय नवलपरासी (बर्दघाट सुस्ता पूर्व) का अनुसार नेपाल नमुना माध्यमिक विद्यालय, केउरेनीको लु १ क ३८१४ नम्बरको बसले ठक्कर दिँदा सोही विद्यालयमा नर्सरी कक्षामा अध्ययनरत चार वर्षीया सुश्माकुमारी पासवान गम्भीर घाइते भएकी थिइन्।
प्रहरी उपरीक्षक युवराज खड्काका अनुसार विद्यालय हाताभित्र बस घुमाउने क्रममा भएको दुर्घटनामा बारा जिल्ला कलैया उपमहानगरपालिका–६ स्थायी ठेगाना भई हाल देवचुली नगरपालिका–१४ छत्तिसघरेमा बसोबास गर्दै आएकी बिबु पासवानकी छोरी घाइते भएकी थिइन्। उनलाई तत्काल उपचारका लागि देवचुली नगर अस्पताल लगिएको भए पनि चिकित्सकले मृत घोषणा गरेका हुन्।
दुर्घटनामा संलग्न बस र चालकलाई प्रहरीले नियन्त्रणमा लिएको छ भने घटनाबारे थप अनुसन्धान भइरहेको प्रहरीले जनाएको छ।
