बीरगन्ज, २३ वैशाख । सिमरा विशेष आर्थिक क्षेत्र मा उद्योग सञ्चालनले गति लिँदै गएको छ। विशेष आर्थिक क्षेत्र (SEZ) अवधारणालाई व्यवहारमा उतार्दै यहाँ रहेका उद्योगहरूले उत्पादन सुरु गरेका छन्।
विशेष आर्थिक क्षेत्र प्राधिकरणका अनुसार कुल ८३३ बिघा क्षेत्रफलमध्ये हाल ३४३ बिघामा विकसित ‘ए’ ब्लकभित्र आधा दर्जनभन्दा बढी उद्योग सञ्चालनमा आइसकेका छन्। प्राधिकरणका प्रमुख पप्पु गिरीका अनुसार सेजभित्रका उद्योगहरू अहिले उत्पादनमै सक्रिय छन् भने एक दर्जनभन्दा बढी उद्योग निर्माणाधीन अवस्थामा छन्।
हाल सञ्चालनमा रहेका उद्योगहरूमा पशुपति सेरामिक्स, ब्रिलियन सु, बालाजी म्यानुफ्याक्चिरिङ, नेपाल एग्रो टुल्स, एसीएम भेहिकल्स र बायोकल्प नेपाल लगायत रहेका छन्। यी उद्योगहरूले विभिन्न उत्पादन गर्दै आएका छन् र करिब ७०० भन्दा बढीलाई प्रत्यक्ष तथा अप्रत्यक्ष रोजगारी प्रदान गरिरहेका छन्।
उदाहरणका लागि, पशुपति सेरामिक्सले मात्र करिब ४५० जनालाई रोजगारी दिएको बताइएको छ। जुत्ता–चप्पलदेखि कृषि उपकरण र औद्योगिक सामग्रीसम्मका उत्पादन यहाँ हुँदै आएका छन्।
सेजमा उद्योग स्थापनाका लागि न्यूनतम दुई करोडदेखि दुई सय करोड रुपैयाँसम्म लगानी गरिएको छ। उद्योगहरूले प्रतिवर्गमिटर पाँच रुपैयाँका दरले जग्गा लिजमा लिएर सञ्चालन गर्न पाउने प्रावधान रहेको छ।
यता, नेपोभिट सेरामिक्स, केभेक्स हिमालयन, रेम्बो एग्रो, ओमकार ग्रेनाइट, हुलास केबल लगायत एक दर्जनभन्दा बढी उद्योग निर्माणको चरणमा छन्।
सेजका अन्य ब्लकहरूमा पनि विस्तारको सम्भावना देखिएको छ। ‘बी’, ‘सी’, ‘डी’ र ‘इ’ ब्लकमा अझै ठूलो परिमाणमा जग्गा उपलब्ध रहेको छ, जसले भविष्यमा थप उद्योग भित्र्याउने आधार तयार गरेको छ।
सरकारले औद्योगिकीकरण र रोजगारी सिर्जनालाई प्राथमिकता दिँदै सेज मोडेललाई अघि बढाइरहेको अवस्थामा सिमरा सेजको प्रगति त्यसैको उदाहरणका रूपमा हेरिएको छ।
