बीरगन्ज,३० वैशाख । यस वर्षको माध्यमिक शिक्षा परीक्षा (एसईई) नतिजामा पनि मधेस प्रदेश सहित सुदूरपश्चिम प्रदेश र कर्णाली प्रदेश तुलनात्मक रूपमा कमजोर देखिएका छन् । राष्ट्रिय औसत ६६ प्रतिशत उत्तीर्ण दर रहँदा यी प्रदेशहरू राष्ट्रिय स्तरभन्दा पछाडि परेका हुन् ।
नतिजाअनुसार सुदूरपश्चिमबाट करिब ५१ प्रतिशत, मधेसबाट करिब ५८ प्रतिशत र कर्णालीबाट करिब ५९ प्रतिशत विद्यार्थी उत्तीर्ण भएका छन् । यसले ती प्रदेशहरूको शैक्षिक उपलब्धि राष्ट्रिय औसतभन्दा कमजोर रहेको देखाएको छ । यसको विपरीत बागमती प्रदेश, गण्डकी प्रदेश र कोशी प्रदेश ले भने तुलनात्मक रूपमा राम्रो नतिजा निकाल्दै आएका छन् । यस वर्ष बागमतीबाट करिब ७८ प्रतिशत, गण्डकीबाट ७३ प्रतिशत र कोशीबाट करिब ७० प्रतिशत विद्यार्थी उत्तीर्ण भएका छन् ।
गत वर्षको तुलनामा केही प्रदेशहरूको नतिजामा उतारचढाव देखिएको छ । विशेषगरी कर्णाली प्रदेश, जुन अघिल्लो वर्ष तुलनात्मक रूपमा राम्रो देखिएको थियो, यस वर्ष कमजोर बनेको छ ।
शिक्षाविद्हरूका अनुसार शिक्षा उपलब्धिमा देखिएको यस्तो असमानता आर्थिक अवस्था, साक्षरता दर र पूर्वाधारसँग समेत सम्बन्धित रहेको छ । तथ्यांकअनुसार साक्षरता दर कम रहेका प्रदेशहरूमा विद्यार्थीको सिकाइ उपलब्धि पनि कमजोर देखिएको छ ।
