काठमाडौं,१८ चैत । अमेरिकी राष्ट्रपति डोनाल्ड ट्रम्प ले इरानसँग जारी द्वन्द्व अन्त्य गर्ने संकेत दिएका छन्। उनले छिट्टै इरानबाट अमेरिकी सेना फिर्ता गर्ने प्रक्रिया सुरु हुने बताएका छन्।
ओभल अफिसबाट दिएको अभिव्यक्तिमा ट्रम्पले आगामी दुईदेखि तीन हप्ताभित्र अमेरिकी सैनिकहरू इरान छोड्ने तयारीमा रहेको जानकारी दिएका छन्। उनले इरानमा अमेरिकी उद्देश्य पूरा भइसकेको दाबी गर्दै अब द्वन्द्व लम्ब्याउनु आवश्यक नरहेको बताएका छन्। यद्यपि, युद्ध अन्त्यअघि कुनै प्रकारको सहमति वा सम्झौता हुन सक्ने सम्भावनालाई भने उनले खुला राखेका छन्।
इरानका रक्षा मन्त्री मसुद पेजेस्कियान ले पनि युद्ध अन्त्यका लागि तेहरान तयार रहेको संकेत दिएका छन्। उनका अनुसार भविष्यमा द्वन्द्व नचर्किने सुनिश्चितता भए इरान शान्तिपूर्ण समाधानतर्फ जान इच्छुक छ।
तर इजरायल को धारणा भने फरक देखिएको छ। इजरायली प्रधानमन्त्री बेन्जामिन नेतन्याहु ले युद्ध अन्त्यका लागि कुनै निश्चित समयसीमा नरहेको बताएका छन्। उनले द्वन्द्व कहिले टुंगिन्छ भन्ने विषय अझै अनिश्चित रहेको स्पष्ट पारेका छन्।
पश्चिम एशियामा रहेका अमेरिकी कम्पनीहरूमाथि इरानले दिएको धम्कीबारे ट्रम्पले त्यसलाई गम्भीर रूपमा नलिएको संकेत दिएका छन्। उनले इरानी नेतृत्वबाट प्रत्यक्ष आक्रमणको सम्भावना न्यून रहेको दाबी गरेका छन्।
यसअघि फेब्रुअरी अन्तिम साता अमेरिका र इजरायलले इरानमा संयुक्त आक्रमण गरेका थिए, जसमा इरानका सर्वोच्च नेता अली खामेनी सहित उच्च अधिकारीहरू मारिएको दाबी गरिएको छ। त्यसपछि उनका छोरा मोज्तबा खामेनी नयाँ सर्वोच्च नेताका रूपमा अघि आएको खबर सार्वजनिक भएको छ, तर यसको आधिकारिक पुष्टि हुन बाँकी छ।
यो घटनाक्रमसँगै खाडी क्षेत्रमा तनाव बढेको छ। इरानले प्रतिशोधस्वरूप अमेरिकी सैन्य अड्डा र ऊर्जा पूर्वाधारमा आक्रमण जारी राखेको बताइएको छ। यस द्वन्द्वका कारण विश्वभर इन्धन आपूर्ति प्रभावित हुँदै गएको छ, जसले अन्तर्राष्ट्रिय बजारमा समेत असर पारेको छ।
