काठमाडाै,२० वैशाख । पहिरोका कारण बिहान अवरुद्ध भएको नारायणगढ–मुग्लिन सडकखण्ड पूर्ण रूपमा सञ्चालनमा आएको छ। वर्षासँगै आज बिहान दुई स्थानमा पहिरो खस्दा यातायात केही समय प्रभावित बनेको थियो।
सडकखण्डको तुइन खोला र पानीधारा क्षेत्रमा ढुङ्गासहितको पहिरो खसेपछि बिहान करिब ५:४५ बजेदेखि यातायात एकतर्फी रूपमा मात्र सञ्चालन भएको थियो। पहिरोका कारण लामो दूरीका सवारी साधन रोकिएका थिए।
इलाका प्रहरी कार्यालय मुग्लिनका प्रहरी निरीक्षक प्रतीक सिंहका अनुसार भरतपुरबाट डोजर मगाएर पहिरो हटाएपछि अहिले सडक दुईतर्फी रूपमा सञ्चालनमा आएको छ।
प्रहरीका अनुसार पानीधारामा खसेको पहिरो भने बिहानै हटाइएको थियो। सडक पूर्ण रूपमा खुलेसँगै यातायात सहज बनेको छ।
