काठमाडौँ,१७ जेठ । अमेरिकाबाट नेपाल फर्कने क्रममा टर्किस एयरलाइन्सको उडानमै एक नेपाली वृद्धको निधन भएको छ। मृत्यु हुनेमा गोरखा स्थायी घर भएका ७३ वर्षीय श्याम मरहट्टा रहेका छन्।
उनी इस्तानबुल हुँदै काठमाडौँ आउँदै गरेको टर्किस एयरलाइन्सको उडान नम्बर टीके–७२६ मा यात्रा गरिरहेका थिए। उडानकै क्रममा उनलाई अचानक स्वास्थ्य समस्या देखिएपछि बेहोस भएका थिए। विमानभित्रै प्राथमिक उपचारको प्रयास गरिए पनि उनलाई बचाउन सम्भव नभएको जनाइएको छ।
त्रिभुवन अन्तर्राष्ट्रिय विमानस्थल स्रोतका अनुसार, विमान अवतरणअघि नै उनको अवस्था गम्भीर बनेको थियो। काठमाडौँ अवतरणपछि चिकित्सकीय परीक्षण गर्दा उनलाई मृत घोषित गरिएको हो।
घटनापछि मरहट्टाको शव पोस्टमार्टमका लागि त्रिवि शिक्षण अस्पताल, महाराजगञ्ज पठाइएको छ। मृत्युको यकिन कारण पत्ता लगाउन सम्बन्धित निकायले अनुसन्धान प्रक्रिया अघि बढाएको जनाएको छ।
लामो समयपछि स्वदेश फर्कने तयारीमा रहेका मरहट्टा आफन्तजनसँग भेटघाट गर्ने योजनामा थिए। तर यात्राकै क्रममा ज्यान गुमाउनुपर्दा परिवार र आफन्तजनमा गहिरो शोक छाएको छ।
स्वास्थ्य विज्ञहरूका अनुसार लामो दूरीको अन्तर्राष्ट्रिय उडान, उच्च उचाइको दबाब र पूर्वरोगका कारण जेष्ठ नागरिकहरूमा यस्तो आकस्मिक स्वास्थ्य समस्या देखिन सक्छ। त्यसैले विशेषगरी वृद्ध यात्रुले यात्रा अघि स्वास्थ्य परीक्षण गराउनु र आवश्यक औषधि साथमा राख्नु अत्यन्त जरुरी रहेको उनीहरूको सुझाव छ।
