काठमाडौँ,२५ जेठ । सरकारले १० जना सचिवको सरुवा गरेको छ। गत शुक्रबारको मन्त्रिपरिषद् बैठकको निर्णयअनुसार सचिवहरूको सरुवा गरिएको प्रधानमन्त्री तथा मन्त्रिपरिषद्को कार्यालयले जनाएको छ।
प्रधानमन्त्री तथा मन्त्रिपरिषद्को कार्यालयका अनुसार मन्त्रालय समायोजन र प्रशासनिक पुनर्संरचनासँगै विभिन्न मन्त्रालय तथा निकायमा कार्यरत सचिवहरूको जिम्मेवारी हेरफेर गरिएको हो।
सरुवाअनुसार वन तथा वातावरण मन्त्रालयका सचिव गोविन्द शर्मा प्रधानमन्त्री तथा मन्त्रिपरिषद्को कार्यालयमा तानिएका छन्। उनलाई त्रिभुवन अन्तर्राष्ट्रिय विमानस्थल समन्वयको जिम्मेवारी दिइएको छ।
त्यस्तै संघीय मामिला तथा सामान्य प्रशासन मन्त्रालयकी सचिव चन्द्रकला पौडेललाई उपराष्ट्रपतिको कार्यालयमा सरुवा गरिएको छ। उपराष्ट्रपति कार्यालयका सचिव कृष्णहरि पुस्करलाई प्रधानमन्त्री कार्यालयमा तानेर अतिरिक्त समूहमा राखिएको छ।
नेपाल ट्रस्टको कार्यालयकी सचिव प्रमिलादेवी शाक्य बज्राचार्यलाई विज्ञान, प्रविधि तथा नवप्रवर्तन मन्त्रालयको जिम्मेवारी दिइएको छ भने ऊर्जा, जलस्रोत तथा सिँचाइ मन्त्रालयका सचिव चिरञ्जीवी चटौतलाई नेपाल ट्रस्टको कार्यालयमा सरुवा गरिएको छ।
जल तथा ऊर्जा आयोगका सचिव दिनानाथ मिश्रलाई राष्ट्रिय सतर्कता केन्द्रमा पठाइएको छ। अर्थ मन्त्रालयका राजस्व सचिव भूपाल बराललाई गण्डकी प्रदेशको सचिवमा सरुवा गरिएको छ।
राष्ट्रिय सतर्कता केन्द्रका सचिव सुरजकुमार वैद्य र स्वास्थ्य तथा खाद्य स्वच्छता मन्त्रालयका सचिव डिल्लीराज शर्मालाई पनि प्रधानमन्त्री तथा मन्त्रिपरिषद्को कार्यालयमा तानिएको छ।
यसैबीच, गण्डकी प्रदेशका प्रमुख सचिव डुण्डुराज घिमिरे निलम्बनमा रहेकाले अतिरिक्त समूहमा राखिएको जनाइएको छ। पोखरा विमानस्थल निर्माणमा कर छुटसम्बन्धी अनियमितता प्रकरणमा उनीविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको थियो।
सरुवा भएका सबै सचिवहरूले सम्बन्धित पत्र बुझिसकेको प्रधानमन्त्री कार्यालयले जनाएको छ। मन्त्रालय पुनर्संरचनापछि भएको यो प्रशासनिक फेरबदललाई सरकारको नियमित कार्यसञ्चालन प्रक्रिया अन्तर्गतको कदमका रूपमा लिइएको छ।
