अविवाहित युवतीले बच्चा जन्माएर , देवघाट लगेपछी

चितवन – आइतबार बिहान चितवनको चितवन मेडिकल कलेजमा २३ वर्षीया गर्भवती युवती उपचारका लागि आइपुगिन् ।
अविवाहित ती युवती आठ महिनाकी गर्भवती थिइन् । सुत्केरी गराउनका लागि अस्पतालले विधिअनुसार उपचार सुरु गर्यो ।
१२ बजे छोरी जन्माइन् । जन्मेको बच्चाको स्वस्थ्य अवस्था कमजोर भयो । अवस्था गम्भीर भएकाले अस्पतालले बच्चाको उपचारपछि निको हुने सम्भावना असाध्यै कम भएको बतायो । भर्खरै जन्मिएको बच्चालाई उपचारको मेसो मिलाउनभन्दा पनि बिरामीसँगै गएका आफन्तले अस्पतालमा उपचार नगर्ने बताएपछि अस्पतालले पठाइदियो ।
आफन्तले घर लैजाने भन्दै लिएर हिँडे । बच्चाको मृत्यु भएको ठानेर देवघाटमा लगी पुर्न तयार भए । खाडल खनेर पुर्न लाग्दा वरिपरि जम्मा भएकाहरुले बच्चा चलमलाएको देखे । जानकारी प्राप्त भएपछि देवघाट पुगेको प्रहरी र आफन्तको सहयोगमा बच्चालाई पुनः अस्पताल ल्याइयो ।
चितवन मेडिकल कलेजमा नै उपचार गरियो । उपचार सफल भएन । सोमबार दिउँसो सवा १२ बजे अस्पतालले बच्चालाई मृत घोषणा गर्यो । घटनापश्चात थप अनुसन्धानका लागि प्रहरीले युवतीकी आमालाई प्रहरी कार्यालयमा राखेको छ ।
अविवाहित युवतीले बच्चा पाएको र अस्पतालमा आएर जन्मिएपछिहतार हतारमा घर लाने भन्दै देवघाटमा लगेकाले के भएको हो भन्ने विषयमा अहिले प्रहरीले अनुसन्धान गरिरहेको छ ।