काठमाडौं, ६ वैशाख । रूपन्देहीको बुटवलमा शुक्रबार बिहान एक युवतीमाथि गोली प्रहार भएको छ। बुटवल उपमहानगरपालिका–११, बुद्धनगरमा साढे ९ बजेतिर घटेको घटनामा युवतीको ढाडमा गोली लागेर गम्भीर घाइते भएको इलाका प्रहरी कार्यालय बुटवलले जनाएको छ।
प्रहरीका अनुसार, मोटरसाइकलमा आएका अज्ञात व्यक्तिले युवतीलाई गोली हानी फरार भएको हो। घटनापछि स्थानीय बासिन्दा आत्तिएका छन् भने प्रहरीले तत्काल अनुसन्धान सुरु गरेको जनाएको छ।
घाइते युवतीलाई लुम्बिनी प्रादेशिक अस्पतालमा भर्ना गरिएको छ। उनको परिचय खुलेको छैन र अवस्था गम्भीर रहेको इलाका प्रहरी कार्यालयका प्रमुख प्रहरी नायब उपरीक्षक (डीएसपी) इन्द्रबहादुर रानाले जानकारी दिए।
घटनास्थलमा प्रहरीको टोली खटिएको छ र आसपासको सुरक्षा कडा पारिएको छ। घटना आपसी दुश्मनी, अपराध वा व्यक्तिगत कारणका आधारमा भएको हो कि भन्नेबारे अनुसन्धान जारी रहेको प्रहरीको भनाइ छ।
