काठमाडौं, ७ वैशाख । राष्ट्रिय प्रजातन्त्र पार्टी (राप्रपा)का नेता तथा कार्यकर्ताहरू र सुरक्षाकर्मीबीच काठमाडौंमा झडप भएको छ। निषेधित क्षेत्र तोडेर अघि बढ्न खोज्दा प्रहरी र प्रदर्शनकारीबीच बानेश्वर क्षेत्रमा घम्साघम्सी भएको हो।
राप्रपाले निषेधित क्षेत्र पार गर्दै सामूहिक गिरफ्तारीको रणनीति बनाएर प्रदर्शनमा उत्रिएको थियो। तर सुरक्षाकर्मीहरूले रोक्न खोज्दा स्थिति तनावग्रस्त बन्न पुगेको हो। प्रहरीले प्रदर्शनकारीलाई नियन्त्रणमा लिन प्रयास गरिरहेको छ।
सरकारले निषेधित क्षेत्र उल्लङ्घन गरेमा कानुनी कारबाही गर्ने चेतावनी दिइसकेको छ। त्यसैका आधारमा काठमाडौं उपत्यकामा सुरक्षा सतर्कता उच्च बनाइएको छ। बानेश्वर, माइतीघर, नयाँ बानेश्वर लगायतका स्थानमा सुरक्षाकर्मीको बाक्लो उपस्थिति देखिएको छ।
राप्रपाले वर्तमान राजनीतिक व्यवस्थाको विरोधमा प्रदर्शन गरिरहेको हो। पार्टीले संसदभित्र र बाहिर दुवै दबाबमूलक कार्यक्रम जारी राखेको जनाएको छ।
