वीरगन्ज,१६ बैशाख । मौसम पूर्वानुमान महाशाखाका अनुसार हाल देशमा पश्चिमी वायु, स्थानीय वायु र बङ्गालको खाडीबाट आएको जलवाष्पयुक्त हावाको प्रभावका कारण मधेस प्रदेशसहित विभिन्न क्षेत्रमा मौसम प्रभावित भएको छ ।
महाशाखाले दिएको जानकारीअनुसार मधेस प्रदेशमा आज दिउँसो सामान्यतया बदली रही हल्कादेखि मध्यम वर्षाको सम्भावना छ । मधेस प्रदेशका एक वा दुई स्थानमा चट्याङसहित वर्षा हुने अनुमान गरिएको छ। यो मौसमी प्रभाव रातिसम्म पनि कायम रहने बताइएको छ ।
यसका साथै कोसी, बागमती र गण्डकी प्रदेशका पहाडी भूभागमा पनि बदलीसहित वर्षाको सम्भावना रहेको छ भने हिमाली क्षेत्रमा हल्का हिमपात हुन सक्ने महाशाखाले जनाएको छ ।
मधेस प्रदेशका बासिन्दालाई वर्षा र चट्याङबाट जोगिन सतर्कता अपनाउन र आवश्यक तयारी गर्न स्थानीय प्रशासनले सुझाव दिएको छ । थप अपडेटका लागि मौसम पूर्वानुमान महाशाखाको जानकारीलाई निरन्तर अनुसरण गर्न अनुरोध गरिएको छ ।
