काठमाडौं,१९ भदौ । पोर्चुगलको राजधानी लिस्बनमा अवस्थित प्रसिद्ध ग्लोरिया फ्युनिकुलर रेल दुर्घटनामा कम्तिमा १५ जनाले ज्यान गुमाएका छन् भने १८ जना घाइते भएका छन्। दुर्घटना बुधबार साँझ करिब ६ बजे एक डिब्बा पटरीबाट खसेपछि भएको हो।
आपतकालीन सेवाका अनुसार घाइतेमध्ये पाँच जनाको अवस्था गम्भीर छ भने बाँकी १३ जनाले सामान्य चोटपटक पाएका छन्। घाइतेमध्ये एक बच्चा पनि रहेको बताइएको छ।
सुरुवातीमा कैयौं मानिस डिब्बाभित्रै फसेको आशंका गरिएको थियो तर अहिले सबैलाई उद्धार गरिएको अधिकारीहरूले पुष्टि गरेका छन्। मृतकमध्ये केही विदेशी यात्रु पनि रहेको अनुमान छ, तर उनीहरूको नागरिकता भने खुलाइएको छैन।
राष्ट्रपति मार्सेलो रेबेलो डे सुसाले मृतकका परिवारप्रति समवेदना प्रकट गर्दै यो दुर्घटनालाई ठूलो क्षति भएको बताएका छन्। त्यस्तै, लिस्बनका मेयर कार्लोस मोइडेसले राजधानीका लागि यो “दुःखद क्षण” भएको प्रतिक्रिया दिएका छन्।
