काठमाडौ,०६ कात्तिक । अमेरिकी प्रविधि दिग्गज एप्पलले पुनः इतिहास रच्दै विश्व बजारमा आफ्नो दबदबा झनै बलियो बनाएको छ। सोमबार कम्पनीको शेयर मूल्य अभूतपूर्व स्तरमा पुगेसँगै एप्पलको बजार पुँजीकरण (Market Capitalization) करिब ४ ट्रिलियन अमेरिकी डलर (४० खर्ब डलर) नजिक पुगेको हो।
एप्पलको शेयर मूल्यमा ४.२ प्रतिशतको वृद्धि भई प्रतिशेयर २६२.९ डलर पुगेपछि कम्पनीको कुल बजार मूल्य ३.९ ट्रिलियन डलर नाघेको छ। यससँगै एप्पल विश्वकै दोश्रो सर्वाधिक मूल्यवान कम्पनी बनेको छ।
विश्लेषकहरूका अनुसार, एप्पलको शेयरमा आएको यो तीव्र उछालको प्रमुख कारण हालै लञ्च गरिएको आइफोन १७ सिरिजको जबरजस्त बिक्री हो। बजार अनुसन्धान संस्था काउन्टरप्वाइन्टका अनुसार, आइफोन १७ ले अघिल्ला संस्करणहरूभन्दा राम्रो प्रदर्शन गर्दै उच्च बिक्री दर कायम गरेको छ।
सेप्टेम्बरमा लञ्च गरिएको आइफोन १७ सिरिजसँगै एप्पलले सबैभन्दा पातलो आइफोन एयर पनि सार्वजनिक गरेको थियो। नयाँ सिरिजमा ए१९ प्रोसेसर, ६.३ इन्चको सुपर रेटिना एक्सडीआर ओएलइडी डिस्प्ले र सुधारिएको क्यामेरा प्रणाली जस्ता फिचरहरूले उपभोक्तालाई आकर्षित गरेको बताइन्छ।
यदि शेयर मूल्यमा हालको वृद्धि दर निरन्तर रह्यो भने एप्पल छिट्टै ४ ट्रिलियन डलर बजार मूल्य पुग्ने पहिलो अमेरिकी कम्पनी बन्ने सम्भावना देखिएको छ।
एप्पलले यही अक्टोबर ३० मा त्रैमासिक वित्तीय विवरण सार्वजनिक गर्न लागेको छ, जसले शेयर मूल्य अझै उचाल्ने अनुमान गरिएको छ।
हरेक वर्ष विश्व बजारमा सर्वाधिक बिक्री हुने स्मार्टफोनको सूचीमा अग्रस्थानमा रहने एप्पलले यो पटक पनि आफ्नो अग्रता झनै मजबुत बनाएको छ।
