काठमाडाैं,२७ कातिक । बंगलादेशको अन्तर्राष्ट्रिय अपराध ट्राइबुनल–१ (ICT–1) ले अपदस्थ प्रधानमन्त्री शेख हसिना र उनका दुई सहयोगीविरुद्धको मुद्दामा १७ नोभेम्बरमा फैसला सुनाउने मिति तोकेको छ।
मुद्धा गत जुलाईमा सुरु भएको सरकार विरोधी आन्दोलनमा दमन गर्दा मानवताविरुद्ध अपराध गरेको आरोपमा दायर गरिएको हो। ट्राइबुनलका अध्यक्ष न्यायाधिश मोहम्मद गोलाम मोजुम्दरले फैसला मिति निर्धारण गरेका छन्।
पूर्व गृहमन्त्री असदुजामन खान कमाल र पूर्व प्रहरी महानिरीक्षक चौधरी अल मामुनमाथि पनि मानवताविरुद्धको अपराध गरेको आरोप लागेको छ।
बंगलादेशमा जुलाईदेखि अगस्ट २०२४ को सुरुवातसम्मको सरकार विरोधी प्रदर्शनमा प्रहरीले गोली चलाउँदा करिब ६५० जनाको मृत्यु भएको थियो। यस घटनालाई जुलाई नरसंहार पनि भनिन्छ। प्रदर्शनपछि शेख हसिना ५ अगस्टमा देश छाडेर भागेकी थिइन्।
हसिनामाथि हत्या योजना बनाएको, हत्या प्रयास गरेको, यातना दिएको र अन्य अमानवीय कार्य गरेको आरोपमा ट्राइबुनलमा छानविन जारी छ।
