वीरगन्ज,२५ चैत । पर्सास्थित पोखरिया नगरपालिकामा चालू आर्थिक वर्षको बजेट खर्च प्रक्रियाबारे प्रश्न उठ्न थालेका छन्। सार्वजनिक गरिएको चैत महिनासम्मको मासिक फाँटवारीअनुसार बजेटको ठूलो हिस्सा विभिन्न शीर्षकमा खर्च भइसकेको देखिएपछि स्थानीय स्तरमा पारदर्शिताबारे चर्चा सुरु भएको हो।
नगरपालिकाका अनुसार चालू आर्थिक वर्षका लागि स्वीकृत करिब रु ६९ करोड ३५ लाख बजेटमध्ये चैत मसान्तसम्म झण्डै रु ३१ करोडभन्दा बढी खर्च भइसकेको छ भने केही रकम बाँकी रहेको उल्लेख छ। तर खर्च विवरण हेर्दा केही शीर्षकमा अपेक्षाभन्दा बढी र छिटो बजेट खर्च भएको देखिएको छ, जसले खर्चको प्राथमिकता र योजनाबारे प्रश्न उठाएको छ।
विशेषगरी तालिम, मसलन्द, सवारीसाधन मर्मत, इन्धन, आर्थिक सहायता तथा अन्य सञ्चालन खर्चजस्ता शीर्षकमा उल्लेखनीय रकम खर्च भएको विवरण सार्वजनिक भएको छ। केही शीर्षकमा त विनियोजित बजेटको अधिकांश हिस्सा चैत महिनासम्ममै सकिएको देखिन्छ।
यस्तै, चालू आवमा पेश्की रकम पनि ठूलो परिमाणमा देखिएको भन्दै खर्च प्रक्रिया र बिल–भुक्तानी व्यवस्थापनबारे स्थानीय स्तरमा चासो व्यक्त गरिएको छ। विपद् व्यवस्थापन, पूर्वाधार तथा अन्य संवेदनशील क्षेत्रमा खर्चको सन्तुलनबारे पनि प्रश्न उठाइएको छ।
नगरपालिकाका स्रोतका अनुसार केही रकम पेश्कीका रूपमा वितरण भइसकेको र बिल भेरिफिकेसनको प्रक्रिया चलिरहेको छ। तर स्थानीयवासी तथा सरोकारवालाहरूले बजेट खर्चमा पारदर्शिता, प्रभावकारिता र प्राथमिकताबारे थप स्पष्टता आवश्यक रहेको बताएका छन्।
