काठमाडौं,०५ वैशाख । गोकुल बास्कोटा ले राजनीतिक झगडाको समाधान अदालतबाट सम्भव नहुने बताएका छन्। उनले नेपाली कांग्रेस को आधिकारिकता विवादसम्बन्धी फैसलालाई संकेत गर्दै यस्तो धारणा सार्वजनिक गरेका हुन्।
सामाजिक सञ्जालमार्फत प्रतिक्रिया दिँदै बास्कोटाले अन्य झगडामा न्यायका लागि अदालत जानु स्वाभाविक भए पनि राजनीतिक विवाद भने अदालतबाट टुंगो लाग्ने विषय नभएको बताएका छन्। उनका अनुसार राजनीतिक सहमति कानुनी निर्णयले होइन, दलहरूको नियत र आपसी समझदारीले निर्धारण हुन्छ।
उनले अघिल्लो नेपाल कम्युनिष्ट पार्टी (नेकपा) को एकता र त्यसपछिको विघटनलाई उदाहरणका रूपमा प्रस्तुत गर्दै अदालतको निर्णयपछि पनि राजनीतिक समस्या समाधान नभएको स्मरण गराएका छन्।
बास्कोटाले व्यंग्यात्मक शैलीमा कांग्रेसको भविष्यबारे प्रश्न उठाउँदै “रबर जस्तो लचिलो हुने कि सिसाजस्तो चकनाचुर हुने?” भन्ने टिप्पणी समेत गरेका छन्।
उनको यो अभिव्यक्तिले राजनीतिक विवाद समाधानका लागि न्यायालयको भूमिकाबारे नयाँ बहस सुरु गराएको छ।
