काठमाडौं,११ वैशाख । थापाथली क्षेत्रमा सुकुमवासी बस्ती खाली गराउने सरकारी निर्णयविरुद्ध शुक्रबारदेखि प्रदर्शन चर्किएको छ। स्थानीय बासिन्दा, युवा तथा अधिकारकर्मीहरू सडकमा उत्रिएर सरकारको कदमको विरोध गरिरहेका छन्।
प्रदर्शनकारीहरूले “डोजर आतंक बन्द गर”, “आवास अधिकार सुनिश्चित गर” जस्ता नारा लगाउँदै वैकल्पिक व्यवस्था नगरी बस्ती हटाउन खोजिएको भन्दै असन्तुष्टि जनाएका छन्। उनीहरूको भनाइमा, राज्यले पुनर्स्थापनाको स्पष्ट योजना नदिई जबरजस्ती हटाउन खोज्नु अन्यायपूर्ण हो।
यसबीच रवि लामिछाने को अघिल्लो अभिव्यक्ति पनि चर्चामा आएको छ। उनले विगतमा सुकुमवासी बस्तीमा डोजर चलाइए प्रतिरोध गर्ने बताएका थिए। तर अहिले उनी सम्बद्ध राजनीतिक धारकै सरकारबाट बस्ती हटाउने निर्णय भएपछि प्रदर्शनकारीहरूले उनको भूमिकामाथि प्रश्न उठाएका छन्।
सरकारले थापाथलीसहित शंखमूल, शान्तिनगर र मनोहरा क्षेत्रका बस्ती खाली गराउन माइकिङ सुरु गरिसकेको छ। केही परिवारले सामान सार्न थाले पनि धेरैजसो बासिन्दा भने बस्ती नछोड्ने अडानमा छन्।
प्रदर्शन राष्ट्रिय जेनजी नागरिक अभियान को अगुवाइमा भइरहेको छ, जसले थापाथलीदेखि माइतीघर मण्डलासम्म र्याली निकाल्ने तयारी गरेको छ।
यसैबीच बालेन शाह ले सुरक्षा निकायका प्रमुखहरूसँग छलफल गर्दै बस्ती खाली गराउने निर्देशन दिएका थिए। सोही आधारमा ईश्वरराज पौडेल को नेतृत्वमा जिल्ला सुरक्षा समितिले बस्ती खाली गराउने निर्णय गरेको हो, जसमा सुनिता डंगोल लगायत अधिकारीहरू सहभागी थिए।
प्रशासनले पहिलो चरणमै चार बस्तीमा डोजर चलाउने तयारी गरेपछि स्थिति तनावपूर्ण बनेको छ। कतिपय बासिन्दाले स्वेच्छाले स्थान छोडिरहेका छन् भने अन्यले आन्दोलनलाई अझ सशक्त बनाउने चेतावनी दिएका छन्।
देशभर करिब १२ लाख भूमिहीन, दलित तथा अव्यवस्थित बसोवासी रहेको अनुमानले यो मुद्दा केवल स्थानीय नभई राष्ट्रिय सामाजिक र राजनीतिक बहसको विषय बनेको छ।
