काठमाडौं,१३ वैशाख । भारतका विदेश सचिव विक्रम मिस्री निकट भविष्यमा नेपाल भ्रमणमा आउने भएका छन्। बालेन्द्र शाह (बालेन) नेतृत्वमा नयाँ सरकार गठन भएपछि भारतबाट हुन लागेको यो पहिलो उच्चस्तरीय भ्रमण हुनेछ।
भ्रमणका क्रममा मिस्रीले नयाँ सरकारलाई बधाई दिने र प्रधानमन्त्री बालेन शाहको प्रस्तावित भारत भ्रमणबारे छलफल गर्ने कार्यक्रम रहेको बताइएको छ। उनले भारतमा रहेका नेपाली पत्रकारहरूसँगको कुराकानीमा छिट्टै नेपाल आउने तयारी भए पनि भ्रमणको मिति भने तय नभएको जानकारी दिएका छन्।
उनका अनुसार नेपाल–भारत कूटनीतिक सम्बन्धलाई थप सुदृढ बनाउने उद्देश्यले दुवै देशबीच उच्चस्तरीय संवाद भइरहेको छ। यसक्रममा शिशिर खनालसँग निरन्तर छलफल भइरहेको उनले उल्लेख गरेका छन्।
यसअघि मोरिससमा आयोजित एक कार्यक्रममा एस. जयशंकर र परराष्ट्रमन्त्री खनालबीच भेटवार्ता भएको थियो। उक्त भेटमा पनि प्रधानमन्त्री बालेन शाहको भारत भ्रमणबारे छलफल भएको जनाइएको छ।
प्रधानमन्त्री बालेनले भारतको निमन्त्रणा स्वीकार गरिसकेको र उपयुक्त समयमा भ्रमण गर्ने बताएका छन्। सो भ्रमणअघि नै भारतबाट उच्चस्तरीय टोली नेपाल पठाउने सहमति अनुसार विदेश सचिव मिस्रीको भ्रमण तय भएको हो।
यो भ्रमणलाई नेपाल–भारत सम्बन्धमा नयाँ सरकारसँगको प्रारम्भिक कूटनीतिक संवादका रूपमा हेरिएको छ।
