काठमाडौँ, २३ बैशाख । नेपाल प्रहरीका केही प्रहरी वरिष्ठ उपरीक्षक (एसएसपी)हरुको सरुवा भएको छ ।
प्रहरी प्रधान कार्यालय स्रोतका अनुसार महानगरीय अपराध अनुसन्धान महाशाखामा एसएसपी सहकुल थापाको सरुवा भएको छ । उनी विराटनगर तालिम केन्द्रमा कार्यरत थिए ।
अपराध महाशाखामा कार्यरत एसएसपी धिरजप्रताप सिंहलाई तालिम निर्देशनालय सरुवा गरिएको छ ।
महाशाखाका तत्कालीन एसएसपी दिवेश लोहनी ३३ किलो सुन काण्डमा मुछिएपछि सिंहले अघिल्लो वर्ष बैशाख ४ गतेदेखि महाशाखाको कमाण्ड सम्हालेका थिए ।
यस्तै, प्रहरी प्रवक्ताका रुपमा रहेका एसएसपी उत्तमराज सुवेदीको काठमाडौँ प्रहरी परिसरमा सरुवा भएको छ भने परिसरमा कार्यरत बसन्त लामालाई लागुऔषध ब्यूरोमा सरुवा गरिएको छ ।
प्रहरी प्रवक्ताको जिम्मेवारी एसएसपी उमेशराज जोशी सुवेदीले पाएका छन् ।
यसैगरी, प्रहरी प्रधान कार्यालय भर्ना छनौंट महाशाखामा कार्यरत पुरुषोत्तम कँडेललाई विराटनगर तालिम केन्द्रमा सरुवा गरिएको छ ।
