काठमाडौं, वैशाख २३ । राष्ट्रिय जनता पार्टी (राजपा) नेपालका नेता तथा सांसद महन्थ ठाकुरले सिंहदरवार अहिले निरंकुशताको जीवित रुपका रुपमा देखिएको टिप्पणी गरेका छन् ।
प्रतिनिधिसभा बैठकमा सरकारको नीति तथा कार्यक्रममाथि टिप्पणी गर्दै उनले भने, ‘‘सिस्टम बदलिएको छ, तर राज्य पहिलेभन्दा बढी निरंकुश भएको छ । उसको चरित्रमा कुनै परिवर्तन भएको छैन ।’
कञ्चनपुरकी बालिका निर्मला पन्तको बलात्कार र हत्या भएको घटनालाई उदाहरणका रुपमा प्रस्तुत गर्दै उनले निर्मलाको बलात्कार र हत्यामा संलग्नमाथि कारवाहीको माग गर्दै प्रदर्शन हुँदा गोली लागेर मानिसको मृत्यु भएको, कयौं घाइते भएको जिकिर गरे ।
‘पहिला सिंहदरवारलाई निरंकुशताको प्रतिक भनिन्थ्यो,’ उनले भने, ‘अहिले सिंहदरवार निरंकुशताको जीवित रुप देखिन्छ । न्याय माग्दा गोली खानु परेको छ ।’
उनले प्रश्न गरे– ‘यही लोकतन्त्रका लागि हामीले संघर्ष गरेको हो ?’
गणतन्त्र छ, संघीयता संविधानमा भमए पनि व्यवहारमा नदेखिएको उनले बताए । प्रदेशहरुले अधिकार पाउन नसकेको उनको भनाइ थियो । ‘कागजमा कोरिएका छन् तर व्यवहारमा परिवर्तन देखिएका छैनन्,’ उनले भने, ‘आफ्नै घरमा हामीले विदेशीको पीडा भोग्नु परिरहेको छ ।’
समानताको बारेमा बारम्बार भाषण सुनिने गरेको उल्लेख गर्दै उनले भने, ‘समानताको कुरा गर्नु हुन्छ तर कहाँ छ समानता ?’
