काठमाडौं । जाली नोट प्रकरणमा जेल सजाय कटाएर रिहा भएका युनुस अन्सारी पुनः नक्कली भारतीय रुपैयाँ सहित पक्राउ परेका छन् ।
युनुसलाई त्रिभुवन अन्तर्राष्ट्रिय विमानस्थलबाट पक्राउ गरिएको हो । नेपाल प्रहरीको अन्तर्राष्ट्रिय विमानस्थल सुरक्षा कार्यालयका प्रहरी वरिष्ठ उपरीक्षक (एसएसपी) सन्दीप भण्डारीले युनुस पक्राउ परेको पुष्टि गरे ।
नक्कली भारतीय नोटसहित कतारको दोहाबाट काठमाडौं उत्रिएका ३ जना पाकिस्तानी नागरिकलाई ‘रिसिभ’ गर्न पुगेको बेला युनुस पक्राउ परेका हुन् ।
नेपाल प्रहरीका केन्द्रीय प्रवक्ता प्रहरी नायव महानिरीक्षक (डिआईजी) विश्वराज पोखरेलले ठूलो परिमाणमा भारुसहित ६ जना पक्राउ परेको बताए ।
युनुस आफुसहित आफ्ना अन्य २ जना सहयोगी (नेपाली नागरिक) लिएर नक्कली नोट लिएर आएका पाकिस्तानी नागरिकलाई रिसिभ गर्न विमानस्थल पुगेका प्रहरी स्रोतले जानकारी दिएको छ ।
प्रहरीले अहिले बरामद भएको भारु नोटको मुचुल्का उठाउने काम भइरहेको जनाएको छ ।
प्रहरीका अनुसार करिब ५ करोड बढी भारुसहित ६ जना पक्राउ परेका हुन् । यद्यपि नोट गन्ने काम जारी रहेको प्रहरीको भनाइ छ ।
