काठमाडौँ १२ जेष्ठ — अपराध महाशाखा काठमाडौंको टोलीले सिन्धुपाल्चोक पाङ्ग्रेटर १ घर भई हाल काठमाडौं १५ किमडोल बस्दै आएकी अप्सरा श्रेष्ठ कार्कीलाई शुक्रबार पक्राउ गरेको हो ।
३६ बर्षिय श्रेष्ठले घरब्यवहार चलाउन भन्दै माग्न आउने विभिन्न व्यक्तिलाई बढिमा २०र२५ हजार ऋण सापटी दिने गर्थिन् । त्यसबापत ऋणीलाई ब्ल्यांक चेकमा हस्ताक्षर गर्न लगाउँथिन् ।
हस्ताक्षर गराई सकेपछि उनले ती चेकहरूमा आफूखुसी रकम भर्थिन् र चेक बाउन्स गराउँदै दुस्ख दिने गर्थिन ।
महाशाखा प्रमुख सहकुल बहादुर थापाका अनुसार श्रेष्ठले ऋण फिर्ता गर्ने लाई समेत रकम फिर्ता नगरेको भन्दै चेक बाउन्स गराएर दुस्ख दिने गर्थिन् ।
उनीविरुद्ध ६ जनाले महाशाखामा उजुरी दिएका थिए । सोही उजुरी माथि छानविन गर्ने क्रममा उनको यस्तो ठगी ठन्दाको खुलासा भएको हो ।
प्रहरीले फेन्सी व्यवसाय गर्दै आएकी उनीबाट विभिन्न बैंकका ब्ल्यांक चेक ३२ थान, आफूखुसी रकम उल्लेख गरेका चेक ३५ थान र बाउन्स गरिएका चेक ७ थानका साथमा हिसाव किताव राखेको कापी ३४ थान, डायरी र रजिष्टार बरामद गरेको छ ।
बरामद गरिएका ३४ थान चेकमा श्रेष्ठले एक करोड ३४ लाख ६२ हजार बराबरको रकम भरेको पाइएको छ । यस्तै बाउन्स गरिएका चेकमा ५६ लाख बराबरको रकम रहेको प्रहरीले जनाएको छ ।
