सिराहा, १९ माघ । सिराहामा १० देखि १४ वर्ष उमेरका ४५ हजार ४ सय ६३ जना किशोरीलाई पाठेघरको क्यान्सरविरुद्धको एचपीभी खोप लगाइने भएको छ। यो अभियान माघ २२ देखि फागुन ६ गतेसम्म सञ्चालन हुनेछ ।
जिल्ला स्वास्थ्य कार्यालय सिराहाका जनस्वास्थ्य अधिकृत कृष्णदेव यादवका अनुसार, १७ पालिकामा तीन सय ६३ विद्यालय र एक सय ५५ स्वास्थ्य संस्थासहित ५१८ खोप केन्द्र निर्धारण गरिएको छ ।
अभियानले कक्षा ६ देखि १० सम्मका छात्राहरुलाई प्राथमिकता दिइरहेको छ, र विद्यालयहरूलाई खोप केन्द्रका रूपमा प्रयोग गरिनेछ। विद्यालय नआउने वा अन्य स्थानमा रहेका किशोरीहरूलाई पायक पर्ने विद्यालय वा खोप केन्द्रमार्फत खोप दिइनेछ ।
पहिलो चरणमा सिराहा, मिर्चैया, कल्याणपुर, कर्जन्हा, लहान, सुखिपुर लगायतका नगरपालिकामा खोप लगाइने छ। दोस्रो चरणमा अन्य पालिकामा खोप अभियान सञ्चालन गरिने छ ।
जनस्वास्थ्य अधिकृत यादवले खोप सुरक्षित र प्रभावकारी भएको भन्दै सबैलाई अभियानमा सहभागी हुन आह्वान गरेका छन् ।