काठमाडौं,२५ चैत । जिल्ला प्रशासन कार्यालय, काठमाडौंले राष्ट्रिय प्रजातन्त्र पार्टी (राप्रपा) लाई चैत २६ गते भृकुटीमण्डपमा आयोजना गर्न चाहेको आमसभा गर्न अनुमति नदिने निर्णय गरेको छ।
प्रशासकीय अधिकृत सुजन शुभ भ्लोनले आइतबार राप्रपालाई लेखेको पत्रमा यस निर्णयको जानकारी दिएका छन्। सुरक्षा व्यवस्थाको संवेदनशीलता र भृकुटीमण्डपमा शिक्षकहरूको आन्दोलन र राष्ट्रिय जनमोर्चाका कार्यक्रमहरू पूर्वनिर्धारित रहेको कारण प्रशासनले यस निर्णयमा पुगेको जनाइएको छ।
राप्रपाले भने २६ गते भृकुटीमण्डपमा आमसभा गर्ने भन्दै प्रचार गरिसकेको थियो। प्रशासनको ढिलो निर्णयपछि, अब राप्रपाका लागि उक्त स्थानमा आमसभा आयोजना गर्न केही कठिनाइ हुन सक्छ।
राप्रपा हाल राजसंस्था र हिन्दू राष्ट्रको पक्षमा आवाज उठाउँदै, तीनकुने घटनामा पक्राउ परेका आफ्ना नेता तथा कार्यकर्ताको रिहाइको माग गर्दै आन्दोलनरत छ।
