काठमाडौं,०६ वैशाख । वर्षाले नेपाललाई यू–१९ विश्वकपको यात्रा रोकिदिएको छ। काठमाडौंमा शनिबार अफगानिस्तानसँग हुने तय भएको अन्तिम खेल वर्षाका कारण रद्द भएपछि रनरेटको आधारमा अफगानिस्तान यू–१९ विश्वकप २०२६ का लागि छनोट भएको हो।
नेपाल र अफगानिस्तान दुवैले प्रतियोगितामा तीन खेल जितेर समान अंक बनाएका थिए। तर अफगानिस्तानको श्रेष्ठ रनरेट का कारण उनीहरू विजयी घोषित भए।
शनिबार बिहान ९ बजेबाट नेपाल र अफगानिस्तानबीचको निर्णायक खेल तय गरिएको थियो। तर बिहानैदेखि परेको अविरल वर्षाका कारण त्रिवि क्रिकेट मैदान खेल्न अयोग्य बनेपछि खेल सुरु हुन सकेन।
दिउँसो वर्षा रोकिएपछि आयोजकले मैदान सुकाएर खेल गराउने प्रयास गरे पनि दिउँसो २ बजेसम्मको प्रयास असफल भएपछि खेल अन्ततः रद्द गरियो।
नेपालले यस प्रतियोगितामा यूएई, ओमान र हङकङलाई हराउँदै शानदार प्रदर्शन गरेको थियो। अफगानिस्तानले पनि यिनै टोलीमाथि जित निकाल्दै अंक तालिकामा शीर्ष स्थानमा उक्लिएको थियो।
यसपटक आईसीसीले एसिया क्षेत्रबाट मात्र एक टोलीलाई विश्वकपमा प्रवेश दिने व्यवस्था गरेको हुँदा शीर्ष स्थानको टिम मात्रै छनोट हुन सक्थ्यो।
नेपालले सन् २०२४ मा दक्षिण अफ्रिकामा भएको यू–१९ विश्वकपमा भाग लिँदै अफगानिस्तानमाथि शानदार जित निकालेको थियो। तर यसपटक वर्षाले नेपालका युवाको अर्को विश्वकप यात्रा रोकिदिएको छ।
